१६ औं राष्ट्रव्यापी कृष्णमोहन स्मृति खुल्ला ब्याडमिन्टन प्रतियोगिता–२०८० शुरु भएको छ ।

प्रतियोगिताको उद्‌घाटन गर्दै सशस्त्र प्रहरी महानिरीक्षक राजु अर्यालले स्वस्थ जीवनका लागि खेलकुद निकै महत्वपूर्ण रहेको बताए । कुनै पनि खेलाडीले राष्ट्रिय तथा अन्तर्राष्ट्रिय खेलकुद प्रतियोगितामा खेलको भावना र अनुशासित भएर जित हासिल गरेमा उसलाई हेर्ने दृष्टिकोण सदैव सकारात्मक हुने उनको भनाइ थियो ।​

एपीएफ क्लबको आयोजनामा एपीएफ क्लबको कभर्ड हलमा जारी प्रतियोगिता जेठ २४ गतेसम्म सञ्चालन हुनेछ । खेलका मुख्य रेफ्रीलाई सटल कर्क हस्तान्तरण गर्दै महानिरीक्षक अर्यालले प्रतियोगिताको सुभारम्भ गरेका थिए ।

८ लाख ६५ हजार रूपैयाँ पुरस्कार राशि रहेको प्रतियोगितामा १० वटा इभेन्टहरु समावेश गरिएको छ ।

जसमा पुरुष एकल, महिला एकल, पुरुष युगल, महिला युगल, १२ वर्षमुनिका केटा, १९ वर्षमुनिका केटा, भेट्रान्स युगल ४५/५५ वर्ष, मिक्स डबल्स र मास्टर युगल ३५ वर्षमाथि लगायत रहेको छ ।

कार्यक्रममा अवकाश प्राप्त सशस्त्र प्रहरी महानिरीक्षक शैलेन्द्र श्रेष्ठ, सशस्त्र प्रहरी अतिरिक्त महानिरीक्षकहरु नारायणदत्त पौडेल, चन्द्रप्रकाश गौतम, बंशीराज दाहाल, पूर्व सशस्त्र प्रहरी संघका अध्यक्ष अवकाश प्राप्त सशस्त्र प्रहरी अतिरिक्त महानिरीक्षक रविराज थापा, सशस्त्र प्रहरी बल नेपालका वरिष्ठ अधिकृतलगायत नेपाल ब्याडमिन्टन संघका अध्यक्ष रामजीबहादुर श्रेष्ठ, खेलकुद संघसंस्थाका पदाधिकारी तथा खेलाडीहरुको उपस्थिति रहेको थियो ।