विकास कुमालले ११ औँ एनएसए कप पौडी प्रतियोगितामा दुई राष्ट्रिय कीर्तिमान सहित स्वर्ण जितेका छन् ।

कुमालले ५० मिटर र २०० मिटर ब्रेष्ट स्ट्रोकमा कीर्तिमान राखेका हुन् । ५० मिटरमा हिट चरणमा ३०.३० सेकेन्ड र २०० मिटरमा फाइनलमा २ मिनट ३४.७४ सेकेन्ड समयका राष्ट्रिय कीर्तिमान राखेको हुन् । यस अघि दुवै विधाको कीर्तिमान शुभम् श्रेष्ठको नाममा रहेको थियो । ५० मिटरमा शुभमको ३१.५७ र २०० मिटरमा २ मिनट ३६.७५ सेकेन्डको समयको कीर्तिमान रहेको थियो ।

यस्तै नासिर याहा हुसेनले २०० मिटर फ्रिस्टयलमा आफ्नै नाममा रहेको १ मिनट ५९.९४ सेकेन्ड समयको कीर्तिमानलाई हिट चरणमा १ मिनट ५९.६५ सेकेन्ड समयका साथ भङ्ग गरे भने उनले फाइनलमा पुन उक्त समयमा सुधार गर्दै १ मिनट ५८.२३ सेकेन्ड समयमा साथ नयाँ कीर्तिमान कायम गरे ।

यस्तै गरी डुवाना लामाले अर्को कीर्तिमान राखिन् । उनले आफ्नै नाममा ५० मिटर ब्रेष्ट स्ट्रोकमा राखेको ३५.८३ सेकेन्डमा समयमा सुधार गर्दै ३५.७९ सेकेन्ड समयका साथ नयाँ कीर्तिमान कायम गरिन् ।

यसैगरि २०० मिटर ब्याकस्ट्रोकमा तेन्जिङ नामदोल रायन गुरुङ्गले आफ्नो नाममा रहेको २ मिनट ३०.२२ सेकेन्ड समयमा सुधार गर्दै हिट चरणमा २ मिनट २६.६९ सेकेन्ड समयको नयाँ कीर्तिमान कायम गरेका थिए । उनले पुन फाइनलमा उक्त समयमा सुधार गर्दै २ मिनट २२.१५ सेकेन्डको नयाँ कीर्तिमान कायम गरे । फाइनलमा प्रारम्भ भण्डारीले पनि हिट चरणमा तेन्जिनले कायम गरेको २ मिनट २६.६९ सेकेन्डका समयलाई २ मिनट २६.२३ सेकेन्डले तोडेता पनि तेन्जिनको नाममा अन्तिम कीर्तिमान रह्यो ।

५० मिटर बटरफ्लाईमा अजल काजी ताम्रकारले नयाँ कीर्तिमान राखे । उनले सयद हमजा शाहले राखेको २६.९३ सेकेन्ड समयलाई भङ्ग गर्दै हिट चरणमा २६.७९ समयका साथ नयाँ कीर्तिमान राखे भने फाइनलमा उक्त समयमा सुधार गर्दै २६.५७ सेकेन्ड समयका साथ नयाँ कीर्तिमान कायम गरे ।

यस्तै अर्को कीर्तिमान सस्तिका भण्डारीको नाममा रह्यो । भण्डारीले २०० मिटर बटरफ्लाईमा नयन शाक्यको नाममा रहेको ३ मिनट ९.९१ सेकेन्ड समयलाई भङ्ग गर्दै हिट चरणमा ३ मिनट ६.४५ सेकेन्ड समयको नयाँ कीर्तिमान कायम गरिन् ।