स्थानीय तह दलित जनप्रतिनिधि महासंघ गठन भएको  छ ।

देशभरका दलित जनप्रतिनिधिहरूको प्रथम राष्ट्रिय भेला गरी स्थानीय तह दलित जनप्रतिनिधि महासंघ गठन गरिएको हो ।

काठमाडौंको राष्ट्रिय सभागृहमा शनिवारदेखि शुरू भएको भेलाले आइतवार धादिङको नीलकण्ठ नगरपालिकाका उपप्रमुख दीपक विश्वकर्माको अध्यक्षतामा महासंघ गठन गरिएको हो ।
  
महासंघको उपाध्यक्षमा खजुरा गाउँपालिका अध्यक्ष डम्बर विश्वकर्मा र आरूघाट नगरपालिका गोरखाका उपप्रमुख कल्पना नेपाली छन् । 

महासंघको महासचिवमा सरमइरानी गाउँपालिका अध्यक्ष झगबहादुर विश्वकर्मा चयन भएका छन् । भेलाले गुर्भाकोट नगरपालिका सुर्खेतका उपप्रमुख मैना विकलाई उपमहासचिव चयन गरेको छ ।

सचिवमा शुक्लागण्डकी नगरपालिका तनहुँका उपमेयर खुमबहादुर चयन भएका छन् । कोषाध्यक्षमा लुम्बिनी सांस्कृतिक नगरपालिका रूपन्देहीका उपप्रमुख कल्पना हरिजन छन् ।
 
शनिवार उपप्रधानमन्त्री तथा गृहमन्त्री नारायणकाजी श्रेष्ठले भेलाको उद्घाटन गरेका थिए । आइतवार जातीय छुवाछुत मुक्तराष्ट्र घोषणाको १७ वर्ष पुगेको अवसरमा स्थानीय तह दलित जनप्रतिनिधि महासंघ घोषणा गरिएको अध्यक्ष दीपक विश्वकर्माले जानकारी दिए ।
  
महासंघले देशैभरका स्थानीय तहमा दलितमैत्री नीति कानून, योजना, कार्यक्रम र बजेट निर्माणमा सहयोग पुर्‍याउने छ ।
 
दलित जनप्रतिनिधिहरूको क्षमता विकास, सशक्तीकरण गर्नुका साथै असल अभ्यासको सिकाइ आदानप्रदान गर्दै दलित अधिकार र विकासका निमित्त लक्ष्य लिएको अध्यक्ष विश्वकर्माले जानकारी दिए ।
 
भेलाले १५ बुँदे काठमाडौं घोषणापत्र जारी गरेको छ । घोषणापत्रमा जेठ २१ गतेलाई दलित अधिकार दिवस मनाउनुपर्ने मागदेखि एक पालिका एक दलितलाई छात्रवृत्तिमा एमबीबीएस डाक्टर पढाउने विषय समेटिएको छ ।