जुन १६ मा रिलिज हुन लागेको बहुप्रतिक्षित फिल्म 'आदिपुरुष'का निर्माताले हरेक शो मा एक सीट खालि राख्ने निर्णय गरेका छन् ।

रामायणको कथामा निर्मित यस चलचित्रका निर्माताले हरेक हलमा एक सीट अनिवार्य खाली राख्ने निर्णय सुनाएका हुन् ।

उक्त सीट रामभक्त 'हनुमानजी'का लागि खालि राख्न लागिएको निर्माण पक्षको तर्क छ । हनुमानप्रति जनआस्था बढाउने उद्देश्य समेत रहेको बताइएको छ ।

निर्माताले भनेका छन्, जब रामायण पढिन्छ, त्यहाँ भगवान हनुमान प्रकट हुन्छन् । यो हाम्रो विश्वास हो। यस विश्वासलाई सम्मान गर्दै, आदिपुरुषको प्रत्येक स्क्रिनिङमा बिक्री नगरी एक सीट आरक्षित राखिनेछ।'
  
ओम राउतको फिल्म आदिपुरुष हिन्दी, तेलुगु, तमिल, मलयालम र कन्नड भाषामा रिलिज हुनेछ। चलचित्रलाई ओम राउतले लेखन र निर्देशन गरेका हुन् । 

यसमा प्रभास रामको भूमिकामा देखिनेछन् । सीताको भूमिकामा कृति सेनन देखिनेछिन् । सैफ अली खान रावण बनेका छन् ।  

हनुमानको भूमिका मराठी अभिनेता देवदत्त नागेले निभाइरहेका छन् र तपाईले सनी सिंहलाई लक्ष्मणको भूमिकामा देख्नुहुनेछ।  

आदिपुरुष ठूलो बजेटको चलचित्र हो, जुन ५०० करोडमा बनेको हो ।

चलचित्रको टिजर सार्वजनिक भएपछि शुरूमा ट्रोलको शिकार भएको थियो ।

प्रभास र सैफ अली खानको लुक्सलाई लिएर निकै विवाद भएको थियो । फिल्मको भीएफएक्सको पनि खिल्ली उडाइएको थियो ।

त्यसपछि निर्माण युनिटले भीएफएक्समा फेरि काम गरेको छ ।