कल बाइपास गरेर ओटीपी नम्बर चोरी गरेको आरोपमा चिनियाँसहित २ जना पक्राउ

कल बाइपास गरेको आरोपमा दुई जना पक्राउ परेका छन् । केन्द्रीय अनुसन्धान ब्यूरो (सीआईबी) ले कल बाइपास गर्दै गरेको अवस्थामा चिनियाँ नागरिकसहित २ जनालाई पक्राउ गरेको छ । पक्राउ पर्नेमा २२ वर्षीय गणेश श्रेष्ठ र ४० वर्षीय चिनियाँ नागरिक झाओ रहेका छन् ।

उनीहरूले भाइबर, टिकटक, फेसबुकलगायतमा वान टाइम पासवर्ड (ओटीपी) बाइपास गर्दै गरेको अवस्थामा पक्राउ गरेको सीआईबीले जनाएको छ । उनीहरूलाई कुन ठाउँबाट पक्राउ गरिएको भन्ने सीआईबीले खुलाएको छैन । 

उनीहरूको साथबाट ४ लाख ८० हजार नेपाली रुपैयाँ, १ हजार ९ सय अमेरिकी डलर, २ हजार ४ सय थान नेपाली सिम कार्ड, १२८ वटा एन्टेनालगायतका सामग्री पनि बरामद् गरिएको सीआईबीले जनाएको छ ।

सीआईबीका अनुसार चिनियाँ नागरिक झाओ विगत ३ महिनादेखि नेपाल बस्दै आएका थिए ।