रिलिजको तीन दिनअघि नै फिल्म ‘वेलकम टु हेम्जाकोट’को ग्राण्ड प्रिमियर गरिएको छ । शुक्रवारबाट प्रदर्शनमा आउन लागेको फिल्मको मंगलवार बेलुका राजधानीको चाबहिलस्थित ‘एफक्यूब सिनेमाज’मा प्रिमियर गरिएको हो । 

कास्ट एण्ड क्रिउसहित अन्य निम्तालु सेलिब्रिटी र सञ्चारकर्मीले प्रिमियरमा कमेडी–सामाजिक जनरामा बनेको यस फिल्म हेरेका छन् । 

निर्देशक एवं अभिनेत्री दीपाश्री निरौला, निर्देशक शोभित बस्नेत, दिनेश डिसी, अभिनेता सलोन बस्नेत, मुकुन भुषाल, मनिष राउतलगायतका फिल्मकर्मी प्रिमियरमा देखिए । 

त्यस्तै, फिल्मका लेखक एवं निर्देशक सरोज पौडेल, शीर्ष कलाकारहरू बुद्धि तामाङ, विनोद न्यौपाने, सन्दीप सिग्देल, अम्बिका तामाङ, प्रबिल कंडेलसहितको टिम प्रिमियरमा सहभागी रहे । प्रिमियरपछि सञ्चारकर्मीसँग कुरा गर्दै निम्तालु सेलिब्रिटीहरुले फिल्म मन परेको बताए ।

निर्देशक शोभित बस्नेतले हेरुञ्जेल फिल्म रमाइलो लाग्ने बताए । ‘रमाइलो लाग्छ । मज्जाले हाँस्न पाइन्छ । दुई/सवा दुई घण्टा हलमा बस्दा इन्जोय गरेर दर्शकहरू निस्कन पाउनुहुन्छ’ बस्नेतले भने ।

अभिनेता सलोन बस्नेतले हाम्रो गाउँघरमा भइरहेको घटनालाई फिल्ममा समावेश गरिएको पाएको बताए । उनले भने, ‘राम्रोसँग प्रस्तुत गर्ने प्रयास गरिएको छ । मलाई त फिल्म मनपर्‍यो । दर्शकले पनि पक्कै रुचाउनुहुनेछ ।’ 

फिल्मका निर्देशक पौडेलले विभिन्न आरोह–अवरोहपछि फिल्म प्रदर्शनमा आउन लागेको भन्दै खुशी व्यक्त गरे । धेरै ठूलो अपेक्षा नराखी फिल्म हेर्नेहरूलाई मनपर्ने उनले बताए । 

फिल्मका कलाकारहरूले प्रिमियरमा पाएको प्रतिक्रियाले आफूहरूलाई उत्साहित बनाएको बताए । 

२ घण्टा १५ मिनेट अवधिको ‘वेलकम टु हेम्जाकोट’ले ग्रामीण भेगका तीन युवाहरूको कथालाई पेस गरेको छ । अन्तरजातीय प्रेमको कथा पनि फिल्मले वाचन गरेको छ । 

तेज प्रसाद दाहाल प्रस्तुतकर्ता रहेको फिल्मको निर्मातामा जितेन्द्र गिरी र बाबुराम कार्की छन् । 

तस्वीर/भिडियो : विश्वास खनाल/लोकान्तर डटकम