नेकपा(माओवादी केन्द्र)का सांसद लेखनाथ दाहालले सभामुख देवराज घिमिरेले प्रतिनिधि सभा नियमावलीको उल्लंघन गरेको आरोप लगाएका छन् । 

बुधवार प्रतिनिधि सभा बैठकमा बोल्दै सांसद दाहालले सोमवारको बैठकमा प्रधानमन्त्रीलाई रोष्टममा उभ्याएर अन्य सदस्यहरूलाई बोल्न समय दिएको उल्लेख गर्दै सभामुखले प्रतिनिधि सभा नियमावलीको उल्लंघन गरेको बताएका हुन् । 

उनले साभामुखले प्रधानमन्त्रीले बोलिसकेपछि प्रमुख प्रतिपक्ष दलका नेता केपी शर्मा ओलीलाई बोलाएर फेरि टिकाटिप्पणी गर्ने अधिकार दिएको भन्दै आलोचनासमेत गरे । 

उनले प्रतिनिधि सभा नियमावलीको मातहतमा रहेर बैठक सञ्चालन गर्न आग्रह गरे ।  ‘अस्ति प्रधानमन्त्रीले जवाफ दिन रोष्टममा उभिँदा उहाँले जवाफ दिन पाउनुभएन । तपाईंहरूले प्रधानन्त्रीको हुर्मत लिनुभयो । हेप्नुभयो,' उनले भने, 'सदन चलाउँदा सभामुख पनि स्वतन्त्र हुनुहुन्न । सभामुख आफैँले प्रतिनिधि सभा नियमावलीको उल्लंघन गर्नुभएको छ । रोष्टममा प्रधानमन्त्रीलाई रुलिङ गर्ने कि, माननीय सांसदहरूलाई रुलिङ गर्ने ? प्रधानमन्त्रीले बोलिसकेपछि प्रमुख प्रतिपक्ष दलका नेता केपी शर्मा ओलीलाई बोलाएर फेरि टिकाटिप्पणी गर्ने अधिकार सभामुखले दिनुभएको छ ।’

सांसद दाहालले देशमा एकाएक वर्तमान सरकार आएपछि मात्रै बेथिति नआएको बताए ।