राष्ट्रियसभा सदस्य वामदेव गौतमले सरकारले बजेटमा जनताको हितलाई प्राथमिकतामा राख्न नसकेको बताएका छन् ।

बुधवार राष्ट्रियसभाको बैठकमा आगामी आर्थिक वर्षको बजेटमाथिको छलफलमा भाग लिँदै उनले यस्तो बताएका हुन् ।

४ करोड कित्तामा विभाजित कृषि भूमिलाई सरकारले कित्ताकाट फुकुवा गरेर जनताको हितलाई प्राथमिकतामा राख्नबाट चुकेको उनको दाबी थियो ।
कृषि उत्पादन तथा व्यवसायीकरण र औद्योगिकरणले प्राथमिकता पाउनुपर्ने भन्दै उनले बजेटले कृषि क्षेत्रमा रहेका जनताको दयनीय अवस्था देख्न नसकेको बताए ।

साथै उनले बजेटमार्फत सरकारले राष्ट्रिय बजारको संरक्षण र अन्तर्राष्ट्रिय बजारको सुनिश्चितता गर्न नसकेको बताए । ‘कृषि उत्पादन तथा व्यवसायीकरण र औद्योगिकरण आजको प्राथमिकतामा पर्नुपर्छ, त्यसको लागि ठूलो मात्रामा विद्युतीय उर्जाको आवश्यकता पर्छ । हामीसँग कृषि उत्पादनको क्षेत्र करिब २६ लाख हेक्टर रहेको छ’ उनले भने, ‘यदि यसलाई प्राथमिकतामा राखेर अघि बढाउन हो भने प्रतिवर्ष काम गर्ने उमेर भएका १० लाख युवाहरूले रोजगारी प्राप्त गर्नेछन् । यो क्षेत्रलाई हरेक वर्ष पहिलो प्राथमिकतामा राख्नुपर्छ । यसलाई ५ वर्ष नै प्राथमिकतामा राख्दा विदेशमा रहेका सबै नेपालीहरूलाई स्वदेशमा नै रोजगारी प्राप्त गर्नेछन् ।’

बजेटले नेपाली जनतालाई निराश तुल्याउने बाहेक अन्य काम गर्न नसकेको उनको दाबी थियो ।