नेपाल योग खेलकुद संघको आयोजनामा तेस्रो दक्षिण एसियाली योग खेलकुद प्रतियोगिता र माउन्ट एभरेस्ट योग फेस्टिभल च्याम्पियनसीप बिहीवारदेखि शुरू भएको छ । 

प्रतियोगिता नेपाल–भारतमैत्री धर्मशाला तिलगंगामा बिहीवारदेखि शुरू भएको हो ।

बिहीवार एक कार्यक्रमबीच प्रतियोगिताको राष्ट्रिय खेलकुद परिषद्का सदस्य सचिव टंकलाल घिसिङले उद्घाटन गरे । प्रतियोगिता जेठ २७ गतेसम्म सञ्चालन हुने नेपाल योग खेलकुद संघ भक्तपुरका उपाध्यक्ष चन्द्रमणि ढुंगानाले जानकारी दिए ।

उनका अनुसार योग खेलकुद प्रतियोगितामा नेपाल, भारत र बंगलादेश गरी ३ देशका खेलाडी सहभागी भएका छन् ।

प्रतियोगितामा ७ राष्ट्रका खेलाडीले सहभागिता जनाउने भनिए पनि विभिन्न कारणले अन्य देशका खेलाडी सहभागी हुन नसकेको आयोजकले जनाएको छ । स्पर्धामा नेपालबाट महिला र पुरुष गरी ३६ खेलाडीको सहभागिता रहेको जनाइएको छ ।

प्रतियोगितामा विभिन्न उमेर समूहमा प्रतिस्पर्धा हुने बताइएको छ । जसअनुसार ८ देखि ११ वर्ष, १२ देखि १५ वर्ष, १६ देखि १८ वर्ष, १९ देखि २५ वर्ष, २६ देखि ३५ वर्ष र ३५ वर्षदेखि माथिका उमेर समूहमा प्रतिस्पर्धा हुने आयोजकले जनाएको छ ।

माउन्ट एभरेस्ट योग फेस्टिभल पनि जेठ २६ र २७ गते हुने भएको छ । प्रतियोगितामा सार्क राष्ट्रसहित इरान र साउदी अरेबियाका खेलाडीले प्रतिस्पर्धा गर्ने उपाध्यक्ष ढुंगानाले बताए । प्रतियोगितामा करीब ३०० खेलाडीले प्रतिस्पर्धा गर्ने भएका छन् भने नेपालबाट महिला र पुरुष गरी ४२ खेलाडीले प्रतिस्पर्धा गर्ने भएका छन् ।  

विक्रम संवत् २०७३ सालमा राष्ट्रिय खेलकुद परिषद् (राखेप) मा दर्ता भएको संघले २०७४ सालमा प्रथम दक्षिण एसियाली खेलकुद र २०७६ सालमा दोस्रो दक्षिण एसियाली योग खेलकुद प्रतियोगिता सञ्चालन गरेको जनाइएको छ ।