कोशी सरकार टिकाउन एकीकृत समाजवादीलाई फकाउँदै एमाले : दुई मन्त्रालय दिने आश्वासन

नेकपा (एमाले)ले पार्टी नेतृत्वको कोशी सरकार जोगाउन नेकपा (एकीकृत समाजवादी) लाई फकाउन थालेको छ । केही समय अघिसम्म पार्टीको अस्तित्वसमेत स्वीकार्न हिच्किचाउने एमाले बहुमत जुटाउन एकीकृत समाजवादीलाई फकाउन थालेको हो ।

प्रमुख सत्ता साझेदार नेकपा (माओवादी केन्द्र) र जनता समाजवादी पार्टी सरकारबाट बाहिरिएसँगै संकटमा परेको कोशी सरकार बहुमत जुटाउन एकीकृत समाजवादीलाई फकाउन लागेको हो । 

वर्तमान सरकारमा सहभागी भए दुइटा मन्त्रालय दिने अनौपचारिक प्रस्तावसमेत एमालेले एकीकृत समाजवादीलाई पठाएको नेताहरू बताउँछन् । दुई जनालाई मन्त्री बनाइदिने आश्वासन एमालेले दिएको एकीकृत समाजवादीका एक सांसदले जानकारी दिए । ‘पहिला हामी सँगै थियौं । अब पनि ढिलोचाँडो सँगै भइहालिन्छ, सँगै काम गरौँ भनेर एमालेका केन्द्रीय नेताहरूले फोन गरिरहनुभएको छ,’ उनले भने । कोशी प्रदेशमा एकीकृत समाजवादीका चार जना सांसद छन् । 

एमालेले सरकारमा सहभागी हुन प्रस्ताव गरेको एकीकृत समाजवादीकी सांसद विद्या चाम्लिङ राईले पुष्टि गरिन् । मन्त्री दिने आश्वासनसमेत आएको उनले स्वीकार गरिन् । ‘केन्द्रीय तहका नेताहरूले तपाईंहरूसँग मिलेर सरकारले काम गर्न चाहेको भनिरहनुभएको छ। बिचमा तीतामिठा भए पनि हामी बिचमा त्यस्तो केही छैन भनिरहनुभएको छ,' एमाले नेताहरूलाई उदृत गर्दै उनले भनिन्, 'मुख्यमन्त्रीज्यूले तपाईँहरूसँगै बसेर काम गर्ने इच्छा राख्नुभएको छ भनेर फोन आउने गरेको छ ।'

कसले फोन गरेको भन्ने उनले खुलाइनन् । स्रोतका अनुसार चाम्लिङलाई मुख्यमन्त्री कार्कीले नै फोन गर्न नै लगाएका थिए । मुख्यमन्त्री कार्कीका दाजु दीपकले फोन गरेका थिए । 

'फ्लोर क्रस' गरेर भए पनि विश्वासको मत दिन एकीकृत समाजवादीका सांसदलाई एमालेले आग्रह गरेको छ । एकीकृत समाजवादी राष्ट्रिय पार्टी पनि नभएकोले विश्वासको मत दिँदा कारबाही नहुने उनीहरूको तर्क छ । 

एमालेले सरकारले विश्वासको मत नपाउँदा मध्यावधिमा जान सक्ने भन्दै डर पनि देखाउने गरेका छन् । पाँचथर १ (१) बाट निर्वाचित सांसद कमल जवेगु लिम्बूले पनि सरकारमा सहभागी हुने वातावरण बनाउन भन्दै फोन आउने गरेको बताए ।

‘पहिला माधव नेपाल समूहका नेता (१०) बुँदेलाई एमाले अध्यक्ष ओली निकटकाले फोन  गरेर फकाइदिन भनेर भन्दा रहेछन्’,  जबेगुले भने ‘मन चोर्न खोज्छन् । अनि गाली खान्छन् र हाँस्दै फोन राख्छन् ।’

मध्यावधिमा जाँदा तपाइहरूको विचार के छ भनेर बिहीवार मात्र दुई जनाले फोन गरेको उनले बताए। 

प्रदेशसभामा एमालेका ४०, कांग्रेसका २९, माओवादीका (सभामुखसहित) १३, राप्रपाका ६, नेकपा (एकीकृत समाजवादी)का ४ र जसपाका १ सांसद छन् । 

सरकार बनाउन ४७ जना सांसद आवश्यक पर्छ । राप्रपाले साथ दिइरहे एमालेलाई बहुमतका लागि थप एक जना सांसद भए पुग्छ ।

संवैधानिक प्रक्रिया अनुसार सरकारमा सहभागी कुनै पनि राजनीतिक दलले समर्थन फिर्ता लिए मुख्यमन्त्रीले ३० दिनभित्र विश्वासको मत लिनुपर्छ । 

मुख्यमन्त्री कार्कीले असार १५ गते भित्रमा विश्वासको मत लिने बताएका छन् । 

बजेटपछाडि विश्वासको मत लिने मुख्यमन्त्री कार्कीको तयारी छ । पहिला बजेट त्यसपछाडि मात्रै विश्वासको मत लिने उनले बताएका छन् ।