बजेटबारे ओलीको अभिव्यक्ति सत्ताबाट विमुख हुनुपर्दाको पूर्वाग्रह र प्रतिशोध : जनार्दन शर्मा

सत्तारूढ नेकपा (माओवादी केन्द्र)का उपमहासचिव जनार्दन शर्माले एमाले अध्यक्ष केपी शर्मा ओलीले बजेटबारे दिएको अभिव्यक्ति पूर्वाग्रही र प्रतिशोधपूर्ण रहेको बताएका छन् । 

पूर्वअर्थमन्त्रीसमेत रहेका शर्माले शुक्रवार प्रतिनिधिसभा बैठकमा बजेटमाथिको छलफलमा भाग लिँदै बजेटलाई राजनीतिक रंग दिएर हेर्ने काम वस्तुनिष्ठ हुनै नसक्ने बताए । 

‘चालू आर्थिक वर्षको बजेटको समीक्षा गर्दै प्रतिपक्ष दलका नेता केपी शर्मा ओलीज्यूले शून्य मार्क दिनुभयो । उहाँको उक्त मूल्यांकन सत्ताबाट विमुख हुनुपर्दाको पूर्वाग्रह र प्रतिशोध भएको मैले बुझेको छु,' उनले भने, 'यहाँ म कुनै दोहोरी खेल्न चाहन्न । बजेटको वस्तुनिष्ठ समीक्षा गर्नु भन्ने मेरो मान्यता छ ।'

शर्माले आगामी १० वर्षको बजेटको वस्तुनिष्ठ समीक्षा गर्न उच्चस्तरीय आयोग बनाउन प्रस्तावसमेत गरे ।