काठमाडौं, २६ भदौ– कमल थापासँग छुट्टिएर नयाँ पार्टी बनेको राप्रपा प्रजातान्त्रिकका केही सांसदले विद्रोहको चेतावनी दिएपनि पशुपति शम्शेर राणा संकटमा परेका छन् ।

सरकारमा जानका लागि राप्रपाका अध्यक्ष कमल थापासँग विद्रोह गरेर नयाँ पार्टी गठन गरेका राणा विरुद्ध केही सांसद र केन्द्रीय सदस्यले विद्रोहमा उत्रने तयारीमा रहेका हुन् ।

पार्टीमा कुनै छलफल नगरि सुनील थापा, दीपक बोहरा र बिक्रम पाण्डेलाई शेरबहादुर देउवा नेतृत्वको सरकारमा पठाउन लागिएको भन्दै उनीहरु आक्रोशित भएका हुन् ।

पशुपति शम्शेर राणाको निवास महाराजगञ्ज पुगेका १० बढी सांसदहरुले मन्त्री नवनाए राजीनामा दिन धम्की दिएको स्रोतको दाबी छ । उनीहरुले धम्की दिएसँगै नव गठित दल राप्रपा प्रजातान्त्रिकका अध्यक्ष पशुपति शम्शेर राणा तनावमा परेका छन् ।

पुरानै नेतलाई मात्र मन्त्री बनाएको र पार्टीमा सल्लाह नगरेको भन्दै सइन्द्र वान्तवा, राज्यलक्ष्मी, कमलादेवी शर्मा,बबिना मोक्तान लावती लगायतका सांसद राणाको निवास विजयवास पुगेका थिए । उनीहरुले नयाँले पनि अवसर पाउनुपर्ने भन्दै मन्त्री नवनाए राजीनामा दिने चेतावनी दिएका छन् ।

पार्टी विभाजनका बेला राणालाई बलियो साथ दिएपनि लाभको पद लिने बेलामा भने सीमित टाउके नेताहरुलाई मात्रै अवसर दिएको गुनासो असन्तुष्टहरुको छ । हाल मन्त्री हुने तयारीमा रहेका बोहरालाई उपाध्यक्ष र संसदीय दलको नेता पनि बनाइएको छ भने पाण्डेपनि उपाध्यक्ष र दलको उपनेता रहेका छन् । यस्तै सुनील थापा महामन्त्री हुन् । यता अर्का महामन्त्री लामालाई पनि राज्यमन्त्री बनाइन लागिएको तर सारथीहरुलाई भने मन्त्री बनाइनुको साटो छलफल समेत नगरिएकाले आक्रोश पैदा भएको पार्टी स्रोत बताउँछ ।

लाभको पद दिइँदा पूर्व राप्रपा नेपाल पृष्ठभूमिकालाई त झन् महत्व नदिइएको एक सांसदले बताए । पार्टी विभाजन हुँदा राप्रपा नेपाल पृष्ठभूमिका ६ सांसदसहित दर्जनौं केन्द्रीय सदस्यले राणालाई साथ दिएका थिए ।

राप्रपा सांसद राज्यलक्ष्मी श्रेष्ठले पार्टीमा ८ जना महिला सांसद रहेको भएपनि एकजनालाई पनि स्थान नदिइनु दुःखद भएको बताइन् । उनले आफू पदको लागि मरिहत्ते गर्ने मान्छे नभएपनि पार्टीमा उचित सम्मान नहुँदा मन दुखेको बताइन् ।