ब्याज बढेपछि नेप्समा लगातार गिरावट, १२ अंकले घट्यो शेयर बजार

वाणिज्य बैंकहरूले ब्याजदर बढाएपछि शेयर बजार परिसूचक नेप्से लगातार घटिरहेको छ । 

नेप्से परिसूचक घट्नुका साथै कारोबारमा पनि कमी आएको छ । 

सोमवार नेप्से परिसूचक १२.९३ अंकले घटेको छ । नेप्सेको सूचक घट्दा कारोबार रकम पनि १ अर्ब ४० करोड रुपैयाँमा सीमित भएको छ ।

आइतवार शेयर बजार घटेपनि कारोबार भने १ अर्ब ४४ करोड रुपैयाँ भएको थियो ।

बैंकहरूले भदौ १ (शुक्रवार)देखि ब्याजदर बढाएका छन् । बैंकहरूले बढाएको ब्याजदरको प्रभाव स्वरूप आइतवारको नेप्से परिसूचक २१.९९ अंकले घटेर २०११.१४ बिन्दुमा झरेको थियो । सोमवार उक्त सूचक १९९८.२८ अंकमा सीमित भएको छ ।  

नेप्से घटेको दिन सबैभन्दा बढी लक्ष्मी लघुवित्त वित्तीय संस्था र कुथेली बुखरी स्मल हाइड्रोपावरले भने १० प्रतिशतले कमाएका छन् ।

सोमवार सबैभन्दा बढी गुमाउनेमा मेन्छियम हाइड्रोपावर छ, उसले ७.९९ प्रतिशतले गुमाएको छ ।

सोमवार नेप्सेमा सूचीकृत कम्पनीहरूमध्ये २७२ वटा कम्पनीको ४१ लाख कित्ता शेयर ३९ हजार पटक कारोबार भएको छ ।