नेकपा एमाले बागमती प्रदेशको नेतृत्वका लागि पाँच जनाको उम्मेदवारी परेको छ । बुधबार निर्धारित समयभित्र नेतृत्वमा कृष्ण प्रसाद दहाल, केशर बहादुर बुढाथोकी, कैलाश प्रसाद ढुंगेल, सानु कुमार श्रेष्ठ र केशव राज पाण्डेको उम्मेदवारी परेको हो । 

निर्वाचन अधिकृत डिल्ली मैनालीका अनुसार उपाध्यक्षमा चार जनाको उम्मेदवारी परेको छ । सुवासचन्द्र ठकुरी, नारायणप्रसाद खतिवडा, दावादोर्जे लामा, ईश्वरचन्द्र पोखरेल र राजेन्द्र राजथलाको उपाध्यक्षमा उम्मेदवारी दर्ता भएको उनको भनाइ छ । यस्तै सचिवमा पनि चार जनाकै उम्मेदवारी दर्ता भएको छ ।

रत्न गुरुङ, नवराज सिलवाल, हस्तबहदुर पण्डित र डा रामकुमारी अधिकारीको उम्मेदवारी दर्ता भएको हो । खुला र महिला गरी दुई उपसचिवका लागि १२ जनाले उम्मेदवारी दिएका छन् ।

उपसचिवमा खड्गबहादुर खत्री, गंगादेवी श्रेष्ठ, डबल पाण्डे, टासी लामा, भक्तकुमारी लामा, ओमराज पन्त, ठाकुरप्रसाद गजुरेल, कृष्णहरी थापा, रमेश महर्जन, प्रेमबहादुर महर्जन, राजेन्द्र श्रेष्ठ र रिता गौतम ढकालको उम्मेदवारी परेको छ । अधिवेशनले पाँच पदाधिकारीसहित २४० सदस्यीय प्रदेश कमिटी चयन गर्दैछ । नेतृत्व चयनका लागि आज बिहान ८ बजेदेखि मतदानको कार्यसूची तय भएको छ ।