पाकिस्तानको एक टीभीको राजनीतिक संवाद कार्यक्रममा दुई पार्टीका नेताबीच कुटाकुट भएको छ ।

पूर्वप्रधानमन्त्रीद्वय इमरान खान अध्यक्ष रहेको तेहरिक–ए–इन्साफ (पीटीआई) र शहवाज शरिफ नेतृत्वको पाकिस्तानी मुस्लिम लिग नवाज (पीएमएलएन)का नेताबीच कुटाकुट भएको हो ।

एक्सप्रेस टीभीको ‘कल तक’ कार्यक्रममा विवाद भएपछि पहिले पीटीआईका वकिलसमेत रहेका नेता शेर अफजल खान मर्वतले पीएमएलएनका नेता डा अफनान उल्लाह खानमाथि थप्पड हानेका थिए ।

मर्वतले उठेर बसिरहेका खानमाथि जगट्याउँदै थप्पड बर्साए । त्यसको प्रतिकारमा खानले मर्वतलाई ठलेर लडाएका थिए । त्यसपछि होस्ट जाबेद चौधरीले छुट्याउन आइरहेको भिडियोमा देख्न सकिन्छ, जो अहिले सामाजिक सञ्जालमा छाइरहेको छ ।

दुवै नेताले एक–अर्कालाई आफ्नो पार्टीका ठूला नेताको ‘तलुवा चटुवा’ भन्दै आरोप लगाएका थिए । 

यही क्रममा पीएमएलएनका सांसदसमेत रहेका खानले पीटीआई अध्यक्ष इमरान खानलाई सैन्य अधिकारीसँग गोप्य वार्ता तथा दुष्कर्म गरेको आरोप लगाउन थाले ।

यसपछि दुवै नेता एक–अर्काको परिवारलाई नै जोड्दै विवाद गरेका थिए ।

खान व्यक्तिगत विषयमा धेरै नै प्रवेश गरेपछि मार्वतले रिस थाम्न सकेनन् र उनीमाथि जाइलागे । मार्वतले टाउको र गालामा थप्पड हानेपछि खानले पनि सहन सकेनन् र परसम्म ठेलेर लडाए, अनि थप्पडसँगै लात्तीलेसम्म भकुर्न भ्याए ।