प्यानल बनाए उम्मेदवारी नै खारेज गर्ने अध्यक्ष केपी शर्मा ओलीको चेतावनीबीच एमाले बागमती प्रदेश कमिटीमा प्यानलगत प्रतिस्पर्धा देखिएको छ ।

सहमति जुटाउने भन्दै चार दिनसम्म अड्काए पनि अध्यक्षका उम्मेदवारद्वय कृष्णप्रसाद दाहाल र कैलाश ढुंगेल तयार नभएपछि अन्ततः निर्वाचन भएको हो । 

जारी निर्वाचनमा अध्यक्षद्वयले पदाधिकारीमा अघोषित प्यानल खडा गरेका हुन् । 

मकवानपुरका दाहालको प्यानलबाट उपाध्यक्षमा नुवाकोटका नारायणप्रसाद खतिवडा छन् । उनी नुवाकोट– २ का पूर्व सांसद समेत हुन् ।

सचिवमा ललितपुरका नवराज सिलवाल उम्मेदवारका रूपमा खडा भएका छन् । सचिवमा दुईजनाको मात्रै उम्मेदवारी परेको छ । उपसचिवमा दाहालतर्फ खुलामा खड्गबहादुर खड्का (सिन्धुली र महिलामा भक्तकुमारी लामा (काभ्रे) छन् । 

दाहाललाई शुरूमा गोकुल बाँस्कोटाले र ढुंगेललाई महेश बस्नेतले अगाडि सारेको बताइएको थियो । अध्यक्ष ओलीले दाहालको उम्मेदवारी फिर्ता गराएर ढुंगेललाई सर्वसम्मत बनाउन निकै कसरत गरे पनि सफल भएनन् । 

ओलीले दाहालको लाइनबाट पछाडि फर्किन बाँस्कोटालाई तयार पारेको बताइन्छ । बाँस्कोटाले त्यसको संकेत शुक्रवार बिहान फेसबूकमार्फत गरेका छन् ।

'मेरो आधिकारिक व्याख्याता म मात्र हुँ, अरू होइन। र, फाइनल्ली भन्छु– म धागो छिनेको चंगा होइन ।'

उनले सामाजिक सञ्जालमा यस्तो लेख्नुलाई अध्यक्ष केपी ओलीकै लाइनमा छु भनेको रूपमा बुझ्नुपर्ने व्याख्या नेताहरूले गरिरहेका छन् ।

‘उहाँको कुरा सहजै बुझिँदैन, तर संस्थापनकै लाइनमा छु भन्ने सन्देश सामाजिक सञ्जालमार्फत दिनुभएको हो कि भन्ने लाग्छ,’ बाँस्कोटा निकटका एक नेताले भने, ‘तर काभ्रे जिल्लाको हकमा निर्देशन नै दिएर उम्मेदवार विशेषको पक्षमा मत हाल्न भनिएको छैन । जसले पाए पनि एमाले उम्मेदवारले नै पाउने भन्ने सन्देश छ ।’

यता अध्यक्ष केपी ओली पक्षधर उम्मेदवार भनेर चर्चा गरिएका ढुंगेलको तर्फबाट उपाध्यक्षमा दावा दोर्जे लामा उम्मेदवार छन् । उनी बागमती प्रदेशका पूर्वमन्त्री पनि हुन् । सचिवमा यो समूहबाट सिन्धुपाल्चोकका हस्त पण्डित अगाडि सारिएका छन् । 

उपसचिव खुलामा ललितपुरका प्रेमबहादुर महर्जन र महिलामा काभ्रेकी गीता गौतम ढकाल चुनावी मैदानमा छिन् । यो पदमा महिलामा दुईजनाको मात्रै उम्मेदवारी परेको छ । तर, खुलामा पनि ९ जना प्रतिस्पर्धामा छन् । 

काठमाडौंपछि ११५ बढी मतका साथ दोस्रो र निर्णायक मत भएकाले दुवै समूहले काभ्रेलाई उपसचिवको उम्मेदवार दिएको हुन सक्ने एक नेता बताउँछन् । 

पूर्व १० भाइको मत पनि निर्णायक रहेको एमालेमा अहिलेसम्म अध्यक्ष केपी ओलीको मात्रै लाइन देखिएको थियो । तर, निर्वाचन हुने भएपछि दोस्रो र तेस्रो तहका नेता पनि विभाजित भइरहेका छन् । यस्तै विभाजित मानसिकतामा पछि एमालेमा मिसिएका पूर्व १० भाइ निकटको मत भने दाहालको पक्षमा जाने बताइन्छ । यो समूहबाट बागमतीमा उपाध्यक्ष सुरेन्द्र पाण्डेले साढे दुई सयभन्दा बढी मत प्रभावित पार्न सक्ने बताइन्छ । 

संस्थापनका हिसाबले ढुंगेल बलियो उम्मेदवारको रूपमा प्रस्तुत भए पनि पार्टीमा परिवर्तनको पक्षधर समूहले दाहाललाई सघाउने देखिएको छ ।

‘देखिनलाई अध्यक्ष ओलीको लाइन र उनी निकटका नेताले ढुंगेललाई समर्थन गरेको जस्तो देखिन्छ,’ एक नेता भन्छन्, ‘तर पहिल्यै कित्ता क्लियर भएको भए दाहालले उम्मेदवारीलाई कायम गराइराख्नुहुन्थेन । केही न केही नेताको साथ पाएरै उहाँ अन्तिमसम्मै उम्मेदवारी कायम राख्नेमा पुग्नुभयो । पार्टीको आन्तरिक गोप्य चुनाव हो । हेरौं, नतिजा जे पनि हुन सक्छ ।’ 

अध्यक्षका उम्मेदवार दाहालले भने प्रतिस्पर्धासम्म पुर्‍याउन सक्नुलाई नै ठूलो उपलब्धि मानेको उनी निकटका एक नेताले बताए ।