मंगलवार दिउँसो गएको भूकम्पको असरले बझाङमा विद्यालयबाट फर्किरहेका विद्यार्थी र सडकमा काम गरिरहेका मजदुरहरू घाइते भएका छन् । 

भोपुरमा सुख्खा पहिलो र खस्दा ३–४ जना विद्यार्थी र जालेबगरमा ढुंगाले लागेर सडकमा काम गरिरहेका २ मजदुर घाइते भएका हुन् ।

विद्यार्थी र महदुरसहित १३ जना घाइते भएको जिल्ला प्रहरी कार्यालय, बझाङले जनाएको छ । 

विद्यार्थीहरूको खुट्टा र टाउकोमा चोट लागेको छ । उनीहरूको जिल्ला अस्पताल बझाङमा उपचार भइरहेको छ ।  

भूकम्पले घर, विद्यालयदेखि सडकसम्ममा क्षति पुगेको स्थानीय पत्रकार नरेन्द्र उपाध्यायले फेसबूकमार्फत जानकारी दिएका छन् ।

उनका अनुसार भूकम्पले बझाङका अधिकांश ठाउँका घर भत्किएका छन् ।

जयपृथ्वी नगरपालिका– ४ मा नरीलाल जोशी, डल्लो जोशी र कविराज जोशीका घरका भित्ता भत्किएका छन् । पत्रकार उपाध्यायको पनि घर चर्किएको छ ।

साथै जयपृथ्वी–४ र सदरमुकाम चैनपुरमा स्टिल र टिनले छाएका अधिकांश पुराना घर बस्न नमिल्ने गरी चकिृएका छन् ।

यस्तै जयपृथ्वी राजमार्गका विभिन्न ठाउँमा सडक भत्किएको छ । कचाली खोलामा पहिलो जाँदा यातायात अवरुद्ध भएको छ । सेती नदी आसपासमा ढिस्काहरू भत्किएका छन् ।

यसैगरी भूकम्पका कारण बझाङको जयपृथ्वी नगरपालिका वडा नम्बर ४ गोलाईमा विद्यालय भवन भत्किएको छ ।

मंगलवार दिउँसो आधा घण्टाको बीचमा दुईपटक भूकम्प जाँदा बालविकास माध्यमिक विद्यालय गोलाईको भवन भत्किएको हो ।

पहिलो धक्कालगत्तै विद्यार्थीहरूलाई घर पठाएकाले मानवीय क्षति हुन नपाएको तस्वीरसहित स्थानीय पत्रकार उपाध्यायले फेसबूकमा लेखेका छन् ।

पूर्ववडाध्यक्ष समेत रहेका विद्यालय व्यवस्थापन समिति अध्यक्ष गगन खातीले दिवा खाजा बनाउने घर भत्किएको जानकारी लोकान्तरलाई दिए ।

विद्यार्थीहरूलाई घर पठाइसकिएकाले चोटपटक लाग्न नपाएको उनले बताए ।

शुरूमा दिउँसो २ बजेर ४० मिनेट जाँदा ५.३ म्याग्निच्युडको भूकम्प गएको थियो । त्यसको २६ मिनेटपछाडि ३ बजेर ६ मिनेट जाँदा ६.३ म्याग्निच्युडको भूकम्प गएको थियो ।

उपाध्यायका अनुसार शुरूको भूकम्पलगत्तै विद्यार्थीहरूलाई घर पठाइएको थियो । दोस्रोपटकको भूकम्पले भवन भत्किएको हो ।

बझाङमा गएको भूकम्पको धक्का काठमाडौंदेखि दिल्लीसम्म महसुस भएको छ । काठमाडौंमा ३ बजेर ८ मिनेट जाँदा धक्का महसुस भएको थियो ।