भारतमा जारी एकदिवसीय क्रिकेट विश्वकपमा न्युजिल्यान्डले श्रीलंकालाई हराउँदै सेमिफाइनलमा पुग्ने सम्भावना बलियो बनाएको छ ।

बैंगलोरमा बिहीवार भएको खेलमा न्युजिल्यान्डले विश्वकपबाट बाहिरिइसकेको श्रीलंकालाई ५ विकेटले हराएको हो ।

श्रीलंकाले दिएको १७२ रनको झिनो लक्ष्य न्युजिल्यान्डले २३.२ ओभरमै ५ विकेटको क्षतिमा पूरा गर्यो । 

न्युजिल्यान्डको जीतमा डेभोन कोनवेले सर्वाधिक ४५, ड्रायल मिचेलले ४३ तथा रचिन रवीन्द्रले ४२ रन बनाए ।

यस्तै ग्लेन फिलिप्स र टोम लाथमले अविजित क्रमशः १७ र २ रन जोडेपछि न्युजिल्यान्डले लक्ष्य भेट्टायो ।

श्रीलंकाका एन्जेलो म्याथ्युजले सर्वाधिक २ विकेट लिएका थिए ।

यसअघि टस हारेर पहिले ब्याटिङको निम्तो पाएको श्रीलंकाले ४६.४ ओभरमा सबै विकेट गुमाएर १७१ रन बनाएको थियो । 

श्रीलंकाका लागि कुशल परेराले अर्धशतकीय पारी खेल्दै सर्वाधिक ५१ रन बनाएका थिए ।

न्युजिल्यान्डका ट्रेन्ट बोल्टले सर्वाधिक ३ विकेट लिए ।

यस जीतले न्युजिल्यान्डले ९ खेलबाट १० अंक जोडेको छ । अब १० अंकमा अफगानिस्तान र पाकिस्तान मात्रै पुग्न सक्छन् । तर नेटरनरेटको कारण पाकिस्तान र अफगानिस्तान दुबै बाहिरिने उच्च सम्भावना छ । अफगानिस्तान ८ खेलमा ४ मा जीत र ४ मा हारसहित छैटौं स्थानमा छ ।

अफगानिस्तानले अन्तिम खेल शुक्रबार दक्षिण अफ्रिकासँग खेल्नेछ । पाकिस्तान ८ खेलमा ४ मा जित र ४ मा हारसहित ८ अंकका साथ पाँचौं स्थानमा छ । पाकिस्तानले अन्तिम खेल शनिवार इंग्ल्यान्डसँग खेल्नेछ ।

पाकिस्तानको नेटरनरेट प्लस ०.०३६ र अफगानिस्तानको माइनस ०.३३८ छ । न्युजिल्यान्डको नेटरनरेट प्लस ०.७४३ छ । नेटरनरेटकै कारण न्युजिल्यान्डले सेमिफाइनल खेल्ने लगभग निश्चितजस्तै देखिन्छ ।

आयोजक भारत ८ खेलमा १६ अंकका साथ शीर्ष स्थानमा छ । दक्षिण अफ्रिका ८ खेलमा १२ अंकका साथ दोस्रो स्थानमा छ । अष्ट्रेलिया ८ खेलमा १२ अंकका साथ तेस्रो स्थानमा छ । दोस्रो सेमिफाइनलमा अष्ट्रेलिया र दक्षिण अफ्रिकाले खेल्ने भएको निश्चित भएको छ ।

भारतले चौथो स्थानमा रहने टोलीसँग खेल्नेछ । न्युजिल्यान्ड र भारतले सेमिफाइनल खेल्ने सम्भावना प्रबल छ । पहिलो सेमिफाइनल १५ नोभेम्बर र दोस्रो सेमिफाइनल १६ नोभेम्बरमा हुनेछ । फाइनल भने १९ नोभेम्बरमा हुनेछ ।