नेपाली कांग्रेसले सरकारी कार्यसम्पादनको समीक्षा गर्न बैठक बोलाउने तयारी गरेको छ ।

सोमबार बिहान सभापति शेरबहादुर देउवाको निवास धुम्बाराहीमा बसेको बैठकले पछिल्लो राजनीतिक परिवेश, अर्थतन्त्रका चुनौती र सरकारले गरिरहेका कामका विषयमा पार्टीका तर्फबाट प्रतिनिधित्व गरेका मन्त्रीलाई बोलाएर छलफल गर्ने तयारी गरेको प्रचार विभाग प्रमुख मीन विश्वकर्माले जानकारी दिए ।

‘कांग्रेस पदाधिकारी बैठकले पछिल्लो राजनीतिक परिवेश, सरकारका काम कारबाही, अर्थतन्त्रमा देखिएका चुनौतीका विषयमा पार्टीमा छलफल गर्न खोजेको छ । यसका लागि छिट्टै बैठक बोलाउने समझदारी भएको छ,’ विश्वकर्माले भने, ‘त्यस्तो बैठकमा सरकारका मन्त्री र केन्द्रीय सदस्यबीच छलफल हुन्छ । मन्त्री र सांसदबीच पनि छलफल हुन्छ । यस्ता छलफलमा सरकारको क्रियाशीलता, कमजोरी र अब गर्नुपर्ने कामका विषयमा संवाद हुन्छ ।’

यस्तो बैठकको संयोजन गर्ने जिम्मा उपप्रधान एवं रक्षामन्त्री पूर्णबहादुर खड्काले पाएको जानकारी विश्वकर्माले दिए ।

प्रचण्ड नेतृत्वको सरकारमा सहभागी भए पनि कांग्रेसका मन्त्रीको कार्यसम्पादन चित्तबुझ्दो नभएको भन्दै प्रश्न उठेपछि कांग्रेसले मन्त्रीलाई नै बोलाएर छलफल गर्न खोजेको हो ।