२६ जेठ २०८३, मंगलबार
नेपाली कांग्रेसका नेता डा शेखर कोइरालाले नेताहरूले उग्र महत्त्वाकांक्षा त्यागेर आफ्नो आचरण नसुधारेसम्म कांग्रेस पार्टी परिवर्तन नहुने बताएका छन् । कांग्रेस लुम्बिनी प्रदेशको प्रथम प्रदेश सम्मेलनलाई शनिवार बुटवलमा सम्बोधन गर्दै उनले यस्तो बताएका हुन् ।
सो अवसरमा कोइरालाले कांग्रेस पार्टी परिवर्तन नभएसम्म देशमा सुशासन नआउने पनि ठोकुवा गरे ।
युवालाई विदेश पलायन हुनबाट रोक्न नसके देश थप धरासायी हुने उनको भनाइ थियो ।
‘दैनिक लस्कर लागेर युवा विदेशिएकोमा हामी कसैलाई चिन्ता छैन । केवल स्वार्थकेन्द्रित राजनीतिमा छौं । अनि देश कसरी देश बन्छ ?’, कोइरालाले प्रश्न गरे ।
कांग्रेसमा संस्थापनइतर पक्षको अगुवाइसमेत गरिरहेका उनले अब कुनै पनि निर्वाचनमा पार्टीले कसैसँग गठबन्धन नगर्ने दोहोर्याए ।
कोइरालाले कांग्रेस एकढिक्का हुन नेताहरूले दम्भ छाड्नुपर्ने स्पष्ट पारे ।
कार्यक्रममा पार्टी सभापति शेरबहादुर देउवा, महामन्त्री गगन थापालगायतका नेता पनि सहभागी थिए ।
