कुटपिट गरी श्रीमतीको हत्या, आरोपी पक्राउ

बुटवलमा एक पुरुषले श्रीमतीलाई कुटपिट गरी हत्या गरेका छन् । गुल्मीको मदाने गाउँपालिका पुर्कोटदह घर भई बुटवल बस्दै आएका ३८ वर्षीय राजु टोटाले आफ्नै श्रीमती सुखसरी बिकलाई कुटपिट गरी हत्या गरेको खुल्नमा आएको हो । 

रूपन्देहीको बुटवल उपमहानगरपालिका वडा नम्बर–१४ शान्तिनगर बस्दै आएका टोटाले श्रीमतीको हत्या गरेर फालेको अवस्थामा शव भेटिएको इलाका प्रहरी कार्यालय बुटवलका डीएसपी दानबहादुर थापाले बताए । मृतक बिकको माइतीघर रुकुम रहेको बताइएको छ । 

विक मृत अवस्थामा फेला परेपछि स्थानीयले प्रहरीलाई खबर गरेका थिए । उनीहरूबीच बेला–बेलामा झगडा हुँदै आएको प्रारम्भिक अनुसन्धानबाट खुलेको छ । उनको कुटपिट गर्दा मृत्यु भएको खुल्न आएकाले टोटालाई पक्राउ गरी कर्तव्य ज्यान कसुरमा मुद्दा दर्ता गरी थप अनुसन्धान भइरहेको प्रहरीले जनाएको छ ।