लुम्बिनीका होटल व्यवसायीको माग– वाह्य पर्यटक बढाउन सरकारी स्तरबाट नीतिगत सुधार होस्

लुम्बिनी प्रदेशका होटल व्यवसायीहरूले वाह्य पर्यटकको आगमन बढाउन सरकारी स्तरबाट नीतिगत सुधारको माग गरेका छन् । लुम्बिनीका पर्यटकीय स्थलदेखि पाँचतारे होटलसम्मका व्यवसायीहरूको संस्था नेप्लिज होटलियर्स एशोसिएसन लुम्बिनी (एनएचए)ले लुम्बिनी केबलकार लिमिटेडसँग मंगलवार गरेको अन्र्तक्रियामा उनीहरूले यस्तो माग गरेका हुन् ।  

नेपाल प्रवेश गर्ने सीमानाका र अध्यागमन कार्यालय परम्परागत र अव्यवस्थित हुँदा पर्यटकहरू चर्को गर्मीमा घण्टौँ लाइन र जाममा बस्नुपरेको होटल व्यवसायीले गुनासो गरे ।

यसले नकारात्मक प्रभाव परेकाले नाका र अध्यागमनलाई आधुनिक र सुविधा सम्पन्न बनाउनुपर्ने उनीहरूको माग छ । 

यस्तै भारतीय पर्यटक चढेका गाडीलाई सडकमा अनावश्यक चेकजाँच गरी दुःख दिने र रकम असुल्ने तथा २५ हजार भारूभन्दा बढी रकम साथमा बोक्न नपाउनेजस्ता प्रावधान पनि गलत भएकाले परिमार्जन गर्नुपर्ने व्यवसायीले औँल्याएका छन् । 

एनएचएका अध्यक्ष प्रवीणबहादुर पाठकले नीतिगत सुधार नगरी पर्यटक भित्र्यााउन र उनीहरूको बसाइ अवधि लम्ब्याउन नसकिने बताए । 

उपाध्यक्ष दिलिप गौचनले बुटवलमा प्रदेशकै पहिलो केबलकार सञ्चालनमा आएर अर्थतन्त्रमा सकारात्मक संकेत देखिएको बताए । प्रदेश राजधानी सरेपछि सुस्ताएको बुटवलको व्यापारमा अहिले आशा पलाएको बताउँदै उनले यसको प्रवद्र्धनमा सरकार र पर्यटन व्यवसायीबीच सहकार्य हुनुपर्ने धारणा राखे ।

एनएचएका सल्लाहकार महेन्द्रनारायण श्रेष्ठले भारतीय पर्यटकका हकमा कम्तीमा एक लाख रुपैयाँ साथमा ल्याउन दिनुपर्ने नियमको माग गरे ।