नेपाललाई लगानीको गन्तव्य बनाउन कानूनी र नीतिगत सुधार गर्छौं : प्रधानमन्त्री

प्रधानमन्त्री पुष्पकल दाहाल ‘प्रचण्ड’ले नेपाललाई लगानीको गन्तव्य बनाउन आवश्यक कानूनी र नीतिगत सुधार गर्न तयार रहेको बताएका छन् ।

राष्ट्रिय व्यावसायिक पहलले गरेको रेस्पोन्सिबल समिटको कार्यक्रमलाई सम्बोधन गर्दै प्रधानमन्त्रीले अर्थतन्त्रलाई चलायमान बनाउनको लागि सबै सहयोग गर्ने बताएका हुन् ।

‘उद्यमी व्यवसायी समेत सम्मिलित हालै युएईमा आयोजित सम्मेलनमा मैले नेपाललाई लगानीको गन्तव्य बनाउन आग्रह गरेको छु। सरकारले यसका लागि आवश्यक कानुनी तथा नीतिगत आधार तयार गर्न प्रतिबद्ध छ। सरकारले अर्थतन्त्रलाई चलायमान बनाउन विभिन्न आर्थिक कार्यक्रमहरु अगाडि सारेको छ। तर यसका लागि व्यवसाय र समाज सबै सरोकारवालाहरु जिम्मेवार बन्नुपर्दछ’ प्रधानमन्त्रीले भने, ‘जिम्मेवार व्यवसायिक अभ्यासहरू नैतिक सामाजिक दृष्टिकोणबाट मात्र नभई व्यावसायिक रणनीतिका हिसाबले पनि फाइदाजनक छन्। जिम्मेवार अभ्यासहरुमार्फत् व्यवसायहरूले दिगो विकासमा योगदान दिन र समाजमा सकारात्मक प्रभाव सिर्जना गर्न सक्छन्।’

मुलुकको प्रमुख साझेदार निजी क्षेत्रमात्र होइन, सरकार र राज्यका सबै निकाय उत्तिकै जिम्मेवार रुपमा प्रस्तुत हुन आवश्यक भएको उनको भनाई छ । 

‘सुशासन र भ्रष्टाचार नियन्त्रणमा सरकारले चालेको कदममा सबैको साथ र सहयोगको लागि आग्रह गर्दछु’ उनले भनेका छन्,  ‘यहाँहरू सबैलाई अवगत नै छ– अर्थतन्त्रको क्षेत्रमा विद्यमान दवावलाई चिर्न र देशभित्र लगानीको वातावरणसहित आशाको रक्तसञ्चार गर्न मैले लगातार प्रयास गर्दै आएको छु। केही दिन पहिला मात्र मैले सरकार, निजी क्षेत्र र आर्थिक क्षेत्रका विज्ञहरू सम्मिलित बैठकको आयोजना गरेर अर्थतन्त्रमा सुधार ल्याउन वृहत् अन्तरक्रिया गरेको छु। अन्तरक्रियापछि केही महत्वपूर्ण घोषणाहरुसमेत गरिएको छ। मेरो विश्वास छ– उक्त अन्तरक्रिया र घोषणाले अर्थतन्त्रमा सुधार ल्याउन महत्वपूर्ण भूमिका खेल्नेछ।’​

तथ्यांकले अर्थतन्त्रमा सुधारको अनुभूति गराए पनि जनतामा आशा नदेखिएको उनको भनाइ छ ।

‘तथ्यांक हेर्दा अर्थतन्त्रमा सुधारको अनुभूति हुँदै गएको देखिन्छ। तर, व्यवहारमा आम जनतामा आशाको रक्तसञ्चार सिर्जना गर्न अझै मेहनत गर्नुपर्ने परिस्थिति हाम्रासामु छ। त्यसैले मैले अर्थतन्त्र सुधारमा केन्द्रित रहेर अझ वृहत् बैठक र केही नयाँ घोषणसमेत गर्ने तयारी गरिरहेको छु’ उनले भने, ‘यसमा समेत यहाँहरूको सक्रिय सहभागिता, महत्वपूर्ण सुझाव र कार्यान्वयनमा जिम्मेवारीबोध एवं तत्परता रहनेछ भन्ने मैले विश्वास लिएको छु ।’

उनले आगामी दिनमा समग्र निजी क्षेत्रमा नेतृत्वदायी भूमिका खेल्न सकोस् भन्ने शुभकामना पनि दिए ।

व्यावसायिक आचारसंहिताको पालना र जिम्मेवार व्यवसाय भन्ने मूल नाराका साथ अभियान सञ्चालन गरिरहेको भन्दै उनले आगामी दिनमा समग्र निजी क्षेत्रमा नेतृत्वदायी भूमिका खेल्न सकोस् भन्ने शुभकामना पनि दिए ।