गाजामा युद्धविरामको प्रस्ताव: सुरक्षा परिषद्को मागमा अमेरिकाको 'भिटो', चीन र रुसद्वारा आलोचना

गाजामा इजरायल र हमासबीच युद्धविराम गर्ने संयुक्त राष्ट्र संघको सुरक्षा परिषद्को मागलाई अमेरिकाले भिटो प्रयोग गरेर रोकिदिएको छ । ​गाजामा तत्काल मानवीय युद्धविरामको माग गर्दै राष्ट्र संघको सुरक्षा परिषद्ले गरेको प्रस्तावमा अमेरिकाले भिटो प्रयोग गरेको बीबीसीले जनाएको छ ।

समाचारमा जनाइएअनुसार लगभग सबै सुरक्षा परिषद्का सदस्यहरू र दर्जनौं अन्य राष्ट्रहरूले समर्थन गरे पनि संयुक्त राष्ट्र संघको प्रस्तावलाई संयुक्त राज्य अमेरिकाले भने भिटो प्रयोग गरेर अस्वीकार गरेको हो । 

‘अमेरिकाले इजरायल र प्यालेस्टाइन दुवै शान्ति र सुरक्षामा बस्न सक्ने दिगो शान्तिलाई समर्थन गर्दछ । तर हामी तत्काल युद्धविरामको आह्वानलाई समर्थन गर्दैनौँ। यसले अर्को युद्धको लागि मात्र बीउ रोप्नेछ, किनभने हमाससँग दिगो शान्ति हेर्ने, दुई-राज्य समाधान हेर्ने इच्छा छैन,’ संयुक्त राष्ट्रका लागि उपअमेरिकी राजदूत रोबर्ट वुडले भने।

सुरक्षा परिषद्का १३ सदस्य राष्ट्रहरूले शुक्रबार संयुक्त अरब इमिरेट्सद्वारा पेश गरिएको संक्षिप्त मस्यौदा प्रस्तावको पक्षमा मतदान गरेका हुन् । १५ सदस्यीय काउन्सिलमा १३-१ मत भएको थियो भने बेलायत अनुपस्थित थियो। युद्धविरामको आह्वानलाई समर्थन गर्नेहरूमध्ये फ्रान्स र जापान पनि थिए।

अमेरिकाको भिटोको चीन र रुसले आलोचना गरेका छन् ।

संयुक्त राष्ट्रका महासचिव एन्टोनियो गुटेर्रेसले दुई महिना लामो युद्धबाट हुने विश्वव्यापी खतराबारे १५ सदस्यीय परिषद्लाई औपचारिक रूपमा चेतावनी दिन बुधबार दुर्लभ कदम चालेपछि मतदान गरिएको हो।

सुरक्षा परिषद्का पाँच स्थायी सदस्यलाई भिटो प्रयोग गर्ने अधिकार हुन्छ । रुस, अमेरिका, चीन, फ्रान्स र बेलायतसँग भिटो प्रयोग गर्ने अधिकार छ ।

यसअघि संयुक्त राष्ट्रसंघको सुरक्षा परिषदमा युक्रेनबारेको एक प्रस्तावमा रुसले भिटो पावरको प्रयोग गरेर त्यसलाई रोकिदिएको थियो । रुसले युक्रेनमा गरेको आक्रमणको निन्दा गर्ने प्रस्तावमा स्थायी सदस्य राष्ट्र रुसले भिटो प्रयोग गरेको थियो ।