आईसीसी यू–१९ क्रिकेट विश्वकप: यसरी पुग्न सक्छ नेपाल सुपर सिक्समा

दक्षिण अफ्रिकामा जारी आईसीसी यू–१९ क्रिकेट विश्वकप प्रतियोगितामा नेपाल दोस्रो खेलमा पनि पराजित भएको छ । बुधवार राति सकिएको आफ्नो दोस्रो खेलमा नेपाल पाकिस्तानसँग ५ विकेटले पराजित भएको हो ।

नेपाल रहेको समूह ‘डी’मा न्युजिल्यान्ड २ खेल जित्दै यसअघि नै सुपर सिक्समा पुगिसकेको छ । नेपाललाई हराएसँगै पाकिस्तान पनि सुपर सिक्समा पुगेको छ । 

नेपाल र अफगानिस्तानले भने न्युजिल्यान्ड र पाकिस्तान दुवैसँग पराजय ब्यहोरेका छन् ।  अब अन्तिम खेलमा लगातार दुई खेलमा पराजित नेपाल र अफगानिस्तान भिड्दैछन् । 

हरेक समूहका शीर्ष तीन टोली सुपर सिक्समा पुग्नेछन् । पाकिस्तान र न्युजिल्यान्ड सुपर सिक्समा पुगिसकेका छन् । 

अन्तिम खेलमा नेपालले अफगानिस्तानलाई हराए सुपर सिक्समा पुग्नेछ ।​ यसर्थ नेपालले अब शुक्रबार हुने उक्त खेल जित्नै पर्ने हुन्छ । अफगानिस्तानलाई हराएको खण्डमा नेपाल सुपर सिक्समा पुग्नेछ । ​

अर्कोतिर न्युजिल्यान्ड र पाकिस्तान भने अब समूह विजेता बन्नलाई प्रतिस्पर्धा गर्नेछन् । यो खेल पनि शुक्रबार नै हुनेछ ।