अख्तियार दुरुपयोग अनुसन्धान आयोगले प्रतिकूल बकपत्र गर्ने सरकारी साक्षीविरुद्ध नै मुद्दा दायर गरेको छ ।

प्रतिकूल बकपत्र गरेको आरोपमा मोरङको सुन्दरहरैंचा नगरपालिकाका यादव रिजालविरुद्ध बुधवार विशेष अदालत काठमाडौंमा मुद्दा दायर गरिएको आयोगका प्रवक्ता नरहरि घिमिरेले जानकारी दिए ।

आयोगका प्रवक्ता घिमिरेका अनुसार नेपाल विद्युत प्राधिकरण इनरुवा वितरण केन्द्रका प्राविधिक कर्मचारी (चौथो तह) विर्जुकुमार महतो प्रतिवादी रहेको भ्रष्टाचार मुद्दामा रिजालले प्रतिकूल बकपत्र गरेका थिए ।

सरकारी साक्षीका रुपमा विशेष अदालतमा पेश गरिएका रिजालले आयोगका अनुसन्धान अधिकृतसमक्ष गरेको बयान कागजको प्रतिकूल हुने गरी बकपत्र गरेपछि उनीविरुद्ध मुद्दा दायर गरिएको प्रवक्ता घिमिरेले जानकारी दिए ।

विद्युत क्षमतामा अभिवृद्धि गर्नका लागि २५ हजार रुपैयाँ घुस लिएको आरोपमा आयोगले  महतोविरुद्ध मुद्दा दायर गरेको थियो ।​​

सरकारी साक्षीका रुपमा विशेषमा पेश गरिएका रिजाललाई कैद र बिगो बमोजिमको जरिवाना मागदाबी ​गर्दै मुद्दा दायर गरिएको आयोगले जनाएको छ ।