गठबन्धन सरकार पूर्णरुपमा असफल भयो : उपाध्यक्ष पौडेल

नेकपा एमालेका उपाध्यक्ष तथा पूर्व अर्थमन्त्री विष्णु पौडेलले वर्तमान गठबन्धन सरकार पूर्णरुपमा असफल भएको बताएका छन् ।

पौडेलले अहिलेको सरकारकै कारण मुलुकमा आर्थिक क्रियाकलाप ठप्प हुनुका साथै विकासका महत्त्वपूर्ण कामहरू समेत रोकिएको दाबी गरे ।

आइतबार बुटवलको नहरपुर माविको नवनिर्मित भवनको उद्घाटन गर्दै उपाध्यक्ष पौडेलले जनताको समृद्धिको चाहना रोक्ने सरकारका गलत कामका विरुद्ध पार्टीले सदन र सडकबाट खबरदारीको विकल्प नभएको समेत स्पष्ट पारे ।

‘सरकारकै कारण आर्थिक गतिविधि संकटोन्मुख भएका छन्’, पौडेलले भने, ‘राष्ट्रियताप्रति अत्यन्त कमजोर, सुशासनप्रति कमजोर छ । विकासप्रति चासो नै छैन । चालू भएका आयोजना बजेट काटेको छ । थप कुनै योजना, आयोजना छैनन्, यो सरकारले मुलुकलाई असफलताको दिशातिर धकेलेको छ ।'

अब सरकारको असफलता प्रमुख प्रतिपक्ष दलले हेरेर नबस्ने उनले बताए । चालू अवस्थामा रहेका विकासका आयोजनाहरूको बजेट सरकारले काट्दा धेरै योजनाहरू अलपत्र परेको पौडेलले बताए । 'शुरू भएका शिक्षा, स्वास्थ्य, पूर्वाधार लगायतका आयोजनाको बजेट काटिएको छ । अब खबरदारी गर्नुपर्ने अवस्था आयो’ उनले भने ।

बुटवलमा विकासका ठूला पूर्वाधार बनिसकेकोले अब आफ्नो ध्यान मानवीय विकासतर्फ केन्द्रित हुने पौडेलको भनाइ छ । ‘रुपन्देहीमा विकासका काम करिब-करिब सकिएका जस्तो लाग्छ’, पौडेलले भने, ‘झुम्साखोला खानेपानीको काम अब आउने चरणमा छ । बुटवल नारायणगढ सडक निर्माणमा ढिलासुस्ती भएको छ । यसलाई खबरदारी गर्नु छ । बुटवल चन्द्रौटा अब बन्ने सडक समयमा सम्पन्न होस भन्ने हाम्रो चाहना हो । यो अन्य आयोजनाहरू सम्पन्न हुने चरणमा छन् । अब रुपन्देही विकासमा अब्बल बनेको छ । हाम्रो ध्यान अब मानवीय विकासमा केन्द्रित हुन्छ ।’ 

रुपन्देही पूर्वाधार विकाससँगै शिक्षाको हब बनेको समेत बताए । केही समय अघिसम्म ओझेलमा परेका यहाँ सामुदायिक विद्यालय राष्ट्रमै प्रथम, द्वितीय र तृतीय हुँदै अब्बल बनेको बताउँदै अब भौतिक पूर्वाधार विकासमा कुनै कमी हुन नदिने पौडेलको भनाइ छ ।

‘यहाँको कालिका, कान्ति, शान्ति, नवीन सैनामैनाको विद्यालय केही समयसम्म ओझेलमा थिए’, पौडेलले भने, ‘अहिले यि विद्यालय देशकै विद्यार्थी संख्या, भौतिक पूर्वाधार र नतिजामा पहिलो दोस्रो र तेस्रो र चौथो सम्म पुगे । यहीँ ठाउँमा अब नहरपुर मावि पनि पुग्दैछ । रुपन्देहीमा विकाससँग शैक्षिक सुधारमा आमूल परिवर्तन आएको छ ।’

यस क्षेत्रका विकासमा तिनै तहका जनप्रतिनिधिहरू मिलेर काम गर्ने नेता पौडेलको भनाइ छ ।