संसद्‌मा घोचपेच - ‘छोरीको नगरपालिका’ भन्ने कुन रहेछ सभामुख महोदय ?

नेकपा एमालेका सांसदले चितवनको भरतपुरलाई ‘छोरीको नगरपालिका’ भनेपछि संसद्‌मा कांग्रेस सांसदले कटाक्ष गरेका छन् ।

शुक्रवार प्रतिनिधि सभाको आकस्मिक समयमा बोल्ने क्रममा प्रमुख प्रतिपक्षी दल एमालेका सांसद सूर्य थापाले प्रधानमन्त्री पुष्पकमल दाहाल 'प्रचण्ड' ‘छोरीको नगरपालिका’ तिर गएको मिडियाबाट थाहा पाएको बताएका थिए । 

सूर्य थापाको भनाइलाई लिएर नेपाली कांग्रेसका रामहरि खतिवडाले कटाक्ष गरेका हुन् । ‘भर्खरै एउटा समाचार यही सुनेँ । ७५३ स्थानीय तहको मलाई थाहा थियो । छोरीको नगरपालिका भन्ने थाहा थिएन, यो कहाँ पर्दो रहेछ ? नयाँ नामाकरण भएछ ? यो कहाँ रहेछ ? जान्न पाए हुन्थ्यो ?’, उनले भने ।

प्रधानमन्त्री प्रचण्ड लगायत राजनीतिक दलका शीर्ष नेता र पूर्वप्रधानमन्त्री शुक्रवार भरतपुर पर्यटन वर्षको कार्यक्रममा सहभागी हुन चितवन पुगेका छन् ।

भरतपुरकी मेयर रेनु दाहाल प्रधानमन्त्री प्रचण्डकी छोरी हुन् ।