...अनि देउवा निवासबाट झण्डा छोपेर फर्किए कांग्रेसका मन्त्री

आफ्नो अपेक्षाको ठीक उल्टो रातारात सरकारको समीकरण फेरिएपछि नेपाली कांग्रेसका मन्त्रीहरू गाडीको झण्डा छोपेर सभापति शेरबहादुर देउवाको निवासबाट फर्किएका छन् ।

आफू सबैभन्दा बढी हिस्सासहित सरकारमा सहभागी भए पनि रातारात प्रधानमन्त्री प्रचण्डले एमाले, रास्वपा र जसपाको समीकरणको अर्को गठबन्धन बनाएपछि देउवाले पदाधिकारी र पूर्व पदाधिकारीलाई छलफलका लागि सोमवार बिहान आफ्नो निवास बूढानीलकण्ठ बोलाएका थिए ।

निवासमा देउवाले ‘प्रधानमन्त्रीले सत्ता गठबन्धन तोड्नुभयो’ भन्ने ब्रिफिङ गरेका थिए । त्यसपछि प्रधानमन्त्रीले गठबन्धन तोडेको भन्दै मन्त्रीले राजीनामा नदिने भन्दै प्रधानमन्त्रीले नै हटाउने पर्खाइमा बस्ने निर्णय कांग्रेसले गरेको छ । देउवा निवासबाट यस्तो निर्णय गरेर फर्किँदा कांग्रेसका मन्त्रीत्रय उपप्रधानमन्त्री एवं रक्षामन्त्री पूर्णबहादुर खड्का, अर्थमन्त्री डा. प्रकाशशरण महत र कानून मन्त्री धनराज गुरुङ पदाधिकारीको हैसियतमा देउवासँग छलफल गर्न पुगेका थिए । तीनमध्ये गुरुङ मन्त्रीको गाडीको झण्डा छोपेर देउवा निवासबाट फर्किएका हुन् ।

बैठकपछि कांग्रेसका प्रमुख सचेतक रमेश लेखकले प्रधानमन्त्रीले गठबन्धन तोडेपछि मन्त्रीले राजीनामा दिइरहनु नपर्ने जानकारी दिए । 

‘बैठकमा सभापतिले प्रधानमन्त्रीबाटै गठबन्धन तोडिएको बताउनुभयो । अब नेपाली कांग्रेस प्रतिपक्षमा नै रमाउँछ’ बैठकपछि लेखकले भने, ‘प्रधानमन्त्रीले गठबन्धन तोडेकोले अब कांग्रेसका मन्त्रीले राजीनामा दिइरहनुपरेन ।’

अर्थमन्त्री डा. महतले पनि नयाँ समीकरण बनेपछि अब राजीनामा दिइरहनु जरुरी नभएको बताए । 

तर अर्को समीकरण बन्ने पक्का भएपछि देउवा निवासबाट खड्का, महत निजी गाडीमा पुग्दा  र गुरुङ झण्डासहितका गाडीमा पुगेका थिए । तर फर्किँदा उनी झण्डा छोपेर निस्किएका छन् । 

कांग्रेस गत चैत १७ गते प्रचण्डको नेतृत्वको सरकारमा सहभागी भएको थियो । गत चुनावमा माओवादीसँगै मिलेर गए पनि एमालेको सहयोगमा पुस १० गते प्रचण्ड प्रधानमन्त्री बनेका थिए ।

देउवाले प्रधानमन्त्री नदिने अडान लिएपछि प्रचण्ड ओलीको समर्थनमा प्रधानमन्त्री बनेका थिए । तर कांग्रेसले विश्वासको मत दिँदै राष्ट्रपति आफ्नो भागमा पारेपछि एमाले सत्ताबाट बाहिरिने र कांग्रेस भित्रिने परिस्थिति बनेको थियो । 

तर फेरि एक वर्षपछि २१ फागुनमा कांग्रेस बाहिरिने र एमाले सरकारमा प्रवेश पाउने गरी नयाँ समीकरण बनेको छ । 

नयाँ समीकरण बन्ने भएपछि गएराति नै देउवाले मन्त्रीहरूलाई बोलाएर छलफल गरेका थिए । संकेत राम्रो नभएको भन्दै उनले मन्त्रीबाट फिर्ता हुने तयारी गर्न पनि देउवाले निर्देशन दिएका थिए ।