अल्पमतमा परेपछि लुम्बिनी प्रदेशका मुख्यमन्त्री डिल्लीबहादुर चौधरी सरकार जोगाउने दौडधूपमा लागेका छन् । बहुमत जुटाउने कसरत गर्दै उनी मन्त्री थप्ने तयारीमा छन् ।

केन्द्रमा बनको नयाँ समीकरणअनुसार चौधरी दौडधूपमा लागे पनि बहुमत पुग्ने सम्भावना न्यून छ ।

लुम्बिनी सरकारका प्रवक्ता सन्तोषकुमार पाण्डेयले नागरिक उन्मुक्ति पार्टी (नाउपा), लोकतान्त्रिक समाजवादी पार्टी (लोसपा) र एक स्वतन्त्र सांसदलाई मन्त्री बनाउने तयारी रहेको जानकारी दिए ।

नागरिक उन्मुक्ति पार्टीबाट २, लोसपाबाट १ र स्वतन्त्रतर्फका १ जनालाई मन्त्री बनाउने मुख्यमन्त्री चौधरीको तयारी छ ।

'आज हेरौं के हुन्छ, भोलिसम्म मुख्यमन्त्रीले मन्त्री थप गर्ने  सम्भावना छ’, पाण्डेयले लोकान्तरसँग भने । 

मुख्यमन्त्री चौधरीले शनिवार बुटवलमा नागरिक उन्मुक्ति पार्टीका संरक्षक रेशम चौधरीसँग गोप्य भेटवार्ता गरेका थिए । बुटवलको एक होटलमा कांग्रेसबाट मुख्यमन्त्री बनेका चौधरी, प्रदेश सभा सदस्य धनेन्द्र कार्की र प्रतिनिधि सभा सदस्य दीपक गिरीबीच छलफल चलेको थियो ।

नाउपाका प्रदेश सरकारका मन्त्री धर्मबहादुर चौधरी लुम्बिनी प्रदेशमा नाउपाले थप एक मन्त्री र एक राज्यमन्त्री मागेको बताइएको छ ।

नयाँ समीकरणअनुसार मुख्यमन्त्रीले माओवादी केन्द्रका मन्त्रीलाई बर्खास्त गरिसकेका छन् । जनता समाजवादी पार्टीका अध्यक्ष उपेन्द्र यादवले शपथ लिए पनि लुम्बिनीका मन्त्रीले राजीनामा दिएका छैनन् ।

८७ सदस्यीय लुम्बिनी प्रदेश सभा लुम्बिनीमा एमालेका २९, कांग्रेसका २७, माओवादीका ११, राष्ट्रिय प्रजातन्त्र पार्टी (राप्रपा) र नागरिक उन्मुक्तिका ४/४, जनता समाजवादी पार्टी (जसपा), जनमत पार्टी र लोकतान्त्रिक समाजवादी पार्टी (लोसपा)का ३/३, स्वतन्त्र, राष्ट्रिय जनमोर्चा र एकीकृत समाजवादीका १/१ जना सांसद छन् ।

लुम्बिनीमा १० राजनीतिक दलको प्रतिनिधित्व छ । राप्रपाका एक जना सांसद भ्रष्टाचारको आरोप लागेपछि निलम्बनमा परेका छन् ।