इलाम–२ मा उम्मेदवार छान्न कांग्रेसको कसरत, बोर्ड बैठकमा नोकझोक

उपनिर्वाचनका उम्मेदवार छान्ने कसरतस्वरुप बसिरहेको नेपाली कांग्रेसको संसदीय बोर्डको बैठकमा नेताहरूबीच नोकझोक भएको छ ।

पार्टी सभापति शेरबहादुर देउवाको निवास बूढानीलकण्ठमा मंगलबार दिउँसो ३ बजेतिर शुरू भएको बैठकमा उम्मेदवार छान्ने विषयमा कुरा नमिलेपछि नोकझोक भएको बैठक स्रोतले लोकान्तरलाई जानकारी दिएको छ ।

इलाम–२ मा सभापति देउवा पक्षका डम्बरबहादुर खड्का र डा शेखर कोइराला पक्षका भेषराज आचार्य प्रमुख दाबेदार छन् ।

यस्तै कोइराला पक्षकै रमेश लिङ्देनले पनि दाबी गरिरहेका छन् ।  

कार्यसम्पादन समितिको बैठकअघि संसदीय बोर्डको बैठक बसेको हो । यसअघि नेताहरूबीच अनौपचारिक छलफल भएको थियो । 

बोर्डको बैठकपछि कार्यसम्पादन समितिको बैठक बस्ने छ । तर उम्मेदवारमा कुरा नमिलेपछि बैठक बस्न ढिलाइ भइरहेको छ 

सभापति देउवाले वैशाख १५ गते हुने उपनिर्वाचनका लागि उम्मेदवार चयनसहित समसामयिक विषयहरूमा छलफल गर्न बैठक बोलाएका हुन् ।

वैशाख १५ गते इलाम–२ मा प्रतिनिधिसभा सदस्य र बझाङ प्रदेशसभा–१ मा प्रदेश सभा सदस्यका लागि निर्वाचन हुँदैछ ।

इलाम–२ मा भने सत्तारुढ दल एमाले र राष्ट्रिय स्वतन्त्र पार्टीले आफ्ना उम्मेदवारको टुंगो लगाएर प्रचारमा लागिसकेका छन् । अर्को सत्तारुढ दल माओवादी केन्द्र र कांग्रेसले भने उम्मेदवारको टुंगो लगाउन सकेका छैनन् ।

बैठकअघि सभापति देउवाले दुवै निर्वाचन क्षेत्रको अवस्थाबारे ग्राउन्ड रिपोर्ट बुझेका छन् ।