म्यानचेस्टर सिटीले लगातार चौथो वर्ष इङ्लिस प्रिमियर लिगको उपाधि जितेको छ । आइतबार राति पाहुना टोली वेस्टह्याम युनाइटेडलाई ३-१ गोल अन्तरले पराजित गरेको सिटीले दुर्लभ इतिहास बनाउँदै उपाधि जितेको हो ।

इङ्लिस फुटबलको १३६ वर्षको इतिहासमा कुनै पनि टोलीले लगातार चारपटक शीर्ष डिभिजनको उपाधि जित्न सकेको थिएन । तर, लगातार चौथोपटक उपाधि जित्दै सिटीले उक्त दुर्लभ इतिहास बनाएको हो । सिटीको यो १०औँ प्रिमियर लिग उपाधि हो । 

सिटीलाई उपाधि दिलाउन फिल फोडेनले २ तथा रोड्रीले १ गोल गरे। वेस्टह्यामका मोहम्मद कुदुसले गोल फर्काए पनि सिटी खेलमा रोकिएन । खेलको दोस्रो मिनेटमै फोडेनले गोल गर्दै सिटीलाई शुरूआती अग्रता दिलाएका थिए । उनले बर्नार्डो सिल्भाको पासमा गोल गरे । 

१८औँ मिनेटमा जेरेमी डोकुको पासमा फोडेनले नै गोल गर्दै सिटीको अग्रता २-० मा पुर्‍याए । तर, ४२औँ मिनेटमा कुदुसले गोल गर्दै वेस्टह्यामलाई २-१ को स्थितिमा ल्याए । ५१औँ मिनेटमा सिल्भाकै पासमा रोड्रीले गोल गर्दै सिटीलाई ३-१ को स्थितिमा पुर्‍याए ।

यस्तै, इङ्लिस प्रिमियर लिगमा आर्सनल पुनः उपविजेतामा सीमित भएको छ । आइतबार राति सम्पन्न खेलमा पाहुना टोली एभर्टनमाथि २-१ गोल अन्तरको जीत हासिल गरे पनि आर्सनल उपविजेता बनेको हो । 

सिटीले ३८ खेलबाट ९१ अंकसहित १०औँपटक लिग जितेको हो । आर्सनलको भने समान खेलबाट ८९ अंकसहित उपविजेता मै सीमित रह्यो । 

गत संस्करण पनि आर्सनललाई ५ अंकले पछि पार्दै सिटीले उपाधि जितेको थियो । आर्सनलको जितमा ताकेहिरो तोमियासु र काई हावर्ट्जले गोल गरे। एभर्टनका इड्रिसा गण गुएएको गोल सान्त्वना बन्यो ।