गगन थापाको समर्थनमा रामकुमारी झाँक्रीः लामिछानेलाई चुनौती

नेकपा एकीकृत समाजवादीकी नेतृ तथा पूर्वमन्त्री रामकुमारी झाँक्री कांग्रेस महामन्त्री गगन थापाको समर्थनमा उत्रिएकी छन् । 

उनले थापा आन्दोलनले जन्माएको नेता भएको र युवाहरुको राजनीतिक आइकन समेत भएको बताएकी छन् । 
सोमबार सामाजिक सञ्जाल फेसबुकमा एक पोस्ट गर्दै झाँक्रीले गृहमन्त्री रवि लामिछानेलाई आरोप प्रमाणित गरेर देखाउन चुनौती दिइन् । 

‘गगन थापा यो आन्दोलनको नेता हो। युवाहरूको राजनितीक आईकन हो। आफ्नो सामर्थ्यले यो तहको नेता बनेको हो’, उनले भनेकी छन्, ‘गगनथापा माथि लगाएको आरोपको प्रमाणको भार स्वयं आरोप लगाउनेले पुरा गर्नुपर्छ, हेक्का रहोस् ।’

आइतबार संसदमा सम्बोधन गर्दै रास्वपाका सभापति समेत रहेका लामिछानेले थापामाथि विदेशीलाई सूचना बेच्न भूमिका खेलेकोसहितका गम्भीर आरोप लगाएका थिए ।