सिरोहिया पक्राउविरुद्ध दैनिक पत्रिकाको सामूहिक विरोध

कान्तिपुर मिडिया ग्रुपका अध्यक्ष कैलाश सिरोहियालाई प्रतिशोध र बदनियत राखेर पक्राउ गरेको भन्दै सञ्चारमाध्यमहरूले सम्पादकीयमा कालो पोतेर सामूहिक विरोध जनाएका छन् । आज काठमाडौंबाट प्रकाशित सबैजसो राष्ट्रिय दैनिक पत्रिकाले विशेष सम्पादकीयको स्थानमा कालो पोतेर ‘तथ्य डग्दैन, कलम झुक्दैन’ शीर्षकको एक लाइनको सम्पादकीय लेखेका छन् ।

कान्तिपुरसहित, अन्नपूर्ण, राजधानी दैनिक, हिमालय टाइम्स, नेपाल समाचार पत्रलगायत पत्रिकाले विशेष सम्पादकीयमा कालो पोतेर सामूहिक विरोध जनाएका हुन् । नयाँ पत्रिका भने सामूहिक विरोधमा सामेल छैन । स्वतन्त्र प्रेसमाथि आक्रमण हुँदा यसरी विरोध जनाउने विश्वव्यापी प्रचलन छ ।

सिरोहिया पक्राउपछि मिडिया सञ्चालकहरूको संस्था नेपाल मिडिया सोसाइटी र मिडिया अलाइन्सले सामूहिक विरोध जनाउने निर्णय गरेको थियो । सोही आधारमा आजका मुख्य दैनिक पत्रिकाहरूले कालो पोतेर विरोध जनाएका हुन् ।

दोहोरो नागरिकता प्रयोग गरेको आरोपमा प्रहरीले सिरोहियालाई मंगलबार कान्तिपुरको कार्यालयबाटै पक्राउ गरेको थियो । सहकारी ठगीमा गृहमन्त्री रवि लामिछानेको संलग्नताको विषयमा कान्तिपुरले निरन्तर समाचार प्रकाशन गरेपछि त्यसकै प्रतिशोधमा सरकारले कान्तिपुरमाथि आक्रमण गरेको मिडिया सञ्चालकहरूको भनाइ छ ।

उपप्रधान एवम् गृहमन्त्री लामिछानेको दबाबमा प्रहरीले सिरोहियालाई पक्राउ गरेको आरोप लागेको छ । सहकारी ठगीबारे कान्तिपुरले राष्ट्रिय स्वतन्त्र पार्टी (रास्वपा) का सभापति लामिछानेलाई जोडेर निरन्तर समाचार प्रकाशित गर्दै आएको छ ।