पशुपतिस्थित किरातेश्वर मृगस्थलीमा हरित काव्य गोष्ठी

शब्दाङ्कुर प्रकाशन र वर्तमान कविता समूहको आयोजनामा विश्व वातावरण दिवस (पर्यावरण दिवस)को अवसर पारेर  हरित काव्य गोष्ठी सम्पन्न भएको छ ।

बुधवार पशुपति क्षेत्रको किरातेश्वर मृगस्थलीस्थित सत्य सनातन बाबाको कुटीमा भेला भएका डेढ दर्जन कविले पर्यावरणसम्बन्धी कविता वाचन गर्नुका साथै कुटीमाथिको जंगलमा पिपलको रूख रोपेका हुन् ।

कार्यक्रममा साहित्यिक पत्रिका शब्दाङ्कुरका प्रधानसम्पादक धीरकुमार श्रेष्ठले वाचन गरिएका कविताहरू अंग्रेजीमा अनुवादन गरेर शब्दाङ्कुरमा प्रकाशित गर्ने लक्ष्य रहेको बताए । 

यस्ता कार्यक्रमलाई निरन्तरता दिँदै जाने उनको भनाइ थियो ।

सो अवसरमा भीष्म उप्रेती, दिव्य गिरी, रोशन शेरचन, धीरकुमार श्रेष्ठ, रामगोपाल आसुतोष, राधिका कल्पित, विनिशा सापकोटा, मनोज न्यौपाने, प्रेमिला राई, पुरुषोत्तम घिमिरे, कञ्चन जीआर मगर, श्रीराम दाहाल, सञ्जय सुमन, चन्द्रबहादुर लामा, शैलेन्द्र सिग्देल, विश्व सिग्देल र रमी प्रियाले पर्यावरणसम्बन्धी कविता तथा मुक्तक वाचन गरेका थिए।

पाठको समयमा बाँसुरीवादक विमल कार्कीले बाँसुरीको धुन प्रस्तुत गरेर रौनक थपेका थिए ।

त्यसक्रममा कवि चन्द्रबहादुर लामाले अंग्रेजी भाषामा अनुवाद गरेका कवितामध्ये भीष्म उप्रेती, धीरकुमार श्रेष्ठ र रोशन शेरचनको कविता कविहरू आफैंले सुनाएका थिए।

कार्यक्रमको समापनका क्रममा सत्य सनातन बाबाले प्रकृतिमाथि जथाभावी आक्रमण गरेर वन विनाश गर्नु सम्पूर्ण मानव सभ्यतालाई नष्ट गर्नुसरह भएको बताए ।

प्रकृतिमाथि भइरहेको ज्यादती रोकेर स्वाधीनता, वैभव र समृद्धिका निम्ति खट्नुपर्ने उनको भनाइ थियो ।