मगरात भूमि अतिक्रमणविरुद्ध बुर्तीवाङमा ​राष्ट्रिय मुक्ति क्रान्तिको सांस्कृतिक प्रतिरोध

​राष्ट्रिय मुक्ति क्रान्ति सम्बद्ध पश्चिम कमान्डले बागलुङको बुर्तीवाङमा ​सांस्कृतिक प्रतिरोध कार्यक्रम गरेको छ ।

जुनतारा पुन मगरको अध्यक्षतामा बहुलराष्ट्रिय राज्य नेपाल स्थापना गर्न तथा ढोरपाटन सिकार आरक्षद्वारा स्वदेशी मगरात भूमि अतिक्रमणविरुद्ध कार्यक्रम गरिएको हो ।

कार्यक्रममा राष्ट्रिय मुक्ति क्रान्तिका संयोजक तथा पूर्वउपप्रधानमन्त्री राजेन्द्र महतोले एकल नश्लीय चिन्तन बोकेका शासकवर्गले साझा नेपाल बन्न नदिएको गुनासो गरेका थिए ।​

उत्पीडितहरूलाई शासक वर्गले एकजुट हुन नदिएको उनको दाबी थियो । त्यसैले आफू पहाड र हिमालतर्फ उक्लिनु परेको संयोजक महतोले बताए । 'जहाँ-जहाँ विभेद, उत्पीडन, अन्याय, अपमान रहन्छ, त्यहाँ-त्यहाँ राष्ट्रिय मुक्ति क्रान्ति हुन्छ,' उनले भने ।

यस्तै, नेता केशव झाले ढोरपाटन सिकार आरक्ष क्षेत्रबाट पीडित भएका मुलवासीहरूको समस्या अब हाम्रो समस्या अब राष्ट्रिय मुक्ति क्रान्तिको भएको बताए । 

राष्ट्रिय तथा अन्तर्राष्ट्रिय मञ्चसम्म समस्या उजागर गर्ने र समाधान खोज्ने उनको भनाइ थियो ।

'हाम्रो उद्देश्य नै जल, जंगल, जमिन माथि आदिवासी मुलवासीहरूको आधिपत्य स्थापित गराउने हो,' उनले भने ।

सांस्कृतिक झाँकीसहित प्रदर्शन भएको र्‍याली नगर परिक्रमा गरी सभामा परिणत भएको थियो।

कार्यक्रममा राष्ट्रिय मुक्ति क्रान्तिका नेतृ कमला गुरुङ, काठमाडौंका चर्चित युवा नेता सुमन सायमी, नेता अनिल महासेठले सम्बोधन गरेका थिए ।​