४ मन्त्रालयमा शेखरपक्षको अडान, सहमति नहुँदा टुंगिएन नाम

नेपाली कांग्रेसको संस्थापन इतर समूहले सरकारमा सहभागिताका लागि आफ्नो समूहले ४ वटा मन्त्रालय पाउनु पर्ने अडान राखेको छ ।

४ मन्त्रालय पाउने विषयमा सहमति जुट्न नसकेपछि सो समूहले मन्त्रीकै नाम टुंगो लगाउन नसकेको हो ।

वरिष्ठ नेता डा. शेखर कोइराला, उपसभापति धनराज गुरुङ र महामन्त्री गगन थापा लगायतबीच आइतबार दिउँसो भएको छलफलमा ४ मन्त्रालयमा अडान राख्ने सहमति भएको थियो ।

‘हाम्रो समूहले पाउने मन्त्रालयको टुंगो नलागेकाले सरकारमा सहभागी हुने मन्त्रीबारे टुंगो लाग्न सकेको छैन,’ कोइराला पक्षका एक नेताले लोकान्तरसँग भने, ‘४ वटा नाममा सहमति भयो भनेर बाहिर आएका समाचार सत्य होइनन्, हाम्रो समूहले ४ मन्त्रालय पाउनेबारे सहमति भइसकेको छैन ।’

स्रोतका अनुसार सभापति शेरबहादुर देउवाले कोइराला समूहसँग २ जनाको नाम मागेका छन् । कोइराला समूहले भने ४ जनाको दाबी गरिरहेको छ ।

प्रधानमन्त्री केपी शर्मा ओलीले सोमबार शपथ लिएर मन्त्रिपरिषद् विस्तारको तयारी गरेका छन् । ओलीले सरकारमा पठाउनेको नाम कांग्रेससँग मागिसकेका छन् । 

संस्थापन समूहबाट रमेश लेखक र डा. आरजु राणा देउवा सरकारमा सहभागी हुने सहमति भइसकेको छ । नेता प्रकाशमान सिंहको नेतृत्वमा सरकारमा सहभागी हुने कांग्रेसको तयारी छ ।

कांग्रेसले गृह, परराष्ट्र, उर्जा, संस्कृति पर्यटन तथा नागरिक उड्डयन, शहरी विकास लगायतका मन्त्रालय लिने सहमति भएको छ ।