वैरागी काइँलाद्वारा गोपी मैनालीको ‘विशृङ्खलित सपना’ लोकार्पित

सुरभि साहित्य प्रतिष्ठानद्वारा वरिष्ठ साहित्यकार गोपी मैनालीको कथासङ्ग्रह विशृङ्खलित सपनाहरू लोकार्पण गरिएको छ । शनिवार अनामनगरमा आयोजित एक कार्यक्रममा नेपाल प्रज्ञा प्रतिष्ठानका पूर्व कुलपति वैरागी काइँलाले उक्त कृति लोकार्पित गरेका हुन् । 

 कथासङ्ग्रह लोकार्पण गर्दै प्राज्ञ काइँलाले विशिष्ट निबन्धकार र समालोचकबाट स्तरीय कथा नेपाली वाङ्मयमा प्राप्त भएकोमा कथाकारलाई बधाई दिँदै आउँदा दिनमा अझै गहकिला कथा प्राप्त होस भन्ने शुभकामना दिए । 

कृतिमाथि समालोचक प्रा डा लेखप्रसाद निरौलाले समीक्षा गर्दै शब्द, संरचना, प्रस्तुति र कथावस्तुका आधारमा मैनालीका कथा निकै उच्च कोटीको भएको विचार व्यक्त गरे । उनले प्रत्येक कथा मानवीय संवेदना र अनुभूतिको विशिष्ट प्रस्तुति भएको प्रतिक्रिया दिए । 

 अर्का समीक्षक अनिता कोइरालाले कथा मानवीय संवेदना, मनोविज्ञान, सामाजिक परिवेश, माया, वात्सल्यका आधारमा निकै उच्च श्रेणीको भएको विचार व्यक्त गरिन् । 

 कार्यक्रममा वरिष्ठ कथाकार विजय चालिसे र प्राज्ञ दिनेशराज पन्तले पनि मैनालीका कथा प्रवृत्तिका विविध कोणबाट प्रकाश पार्दै गुरुप्रसाद मैनालीपछि अर्का जाज्वल्य कथा प्रतिभा पाएको उल्लेख गरे । 

 कलाकारका तर्फबाट नायक सरोज खनाल, साहित्य प्रतिष्ठानहरूका तर्फबाट सुरभि साहित्य प्रतिष्ठानका संरक्षक वेदमणि घिमिरे, समस्त साहित्यिक पत्रकारका तर्फबाट साहित्यिक पत्रकार सङ्घका अध्यक्ष राधेश्याम लेकाली, अन्तर्राष्ट्रिय नेपाली साहित्य समाजका तर्फबाट राजेन्द्र केसी, कर्मचारीहरूका तर्फबाट पूर्व महालेखा परीक्षक टङ्कमणि शर्मा, परिवारका तर्फबाट लेखकका दाजु एवम् लोकसेवा आयोगका पूर्व अध्यक्ष उमेशप्रसाद मैनालीले शुभकामना दिएका थिए । 

कार्यक्रममा कथाकार गोपी मैनालीले समाजमा रहेका पात्रहरूलाई उठाएर आफ्नै समय, समाज र पात्रहरूको अनुभूति टिपेर कथा लेखेको उल्लेख गरे । 

 सुरभि साहित्य प्रतिष्ठानका अध्यक्ष वरिष्ठ आख्यानकार बाजुराम पौडेलले अध्यक्षताको आसनबाट मन्तव्य दिँदै नेपाली निबन्धमा लक्ष्मीप्रसाद देवकोटा र शंकर लामिछानेपछि शीर्ष स्थान लिएका मैनालीले कथा क्षेत्रमा पनि अलग्गै पहिचान दिएको उल्लेख गरे ।