२२ वटा नर्सिङ कलेजलाई सम्बन्धन दिन समितिको निर्देशन

संसदको शिक्षा, स्वास्थ्य तथा सूचना प्रविधि समितिले विभिन्न २२ वटा नर्सिङ कलेजलाई सम्बन्धन दिन सरकारलाई निर्देशन दिएको छ ।

समितिको बिहीबार बसेको बैठकले आशयपत्र प्राप्त गरेका ती कलेजलाई सम्बन्धन दिन शिक्षा, विज्ञान तथा प्रविधि मन्त्रालयलाई निर्देशन दिएको हो । 

आशयपत्र पाएका सांस्थाहरू सम्बन्धन प्राप्त गर्ने प्रक्रियामा प्राविधिक शिक्षा तथा व्यावसायिक तालिम परिषद् (सीटीईभीटी) पुगेको छ । समितिको बैठकले मापदण्ड पूरा गरेर अगाडि बढेका संस्थाहरूलाई सम्बन्धन दिन निर्देश गरेको हो ।

समितिका सभापति अमरबहादुर थापाले सम्पूर्ण मापदण्ड पूरा गरेर पनि सम्बन्धन नपाएका नर्सिङ कलेजलाई सम्बन्धन दिन मन्त्रालयलाई निर्देशन दिएका हुन् । 

‘आवश्यक मापदण्ड, शर्त र प्रक्रिया पूरा गरेका संस्थाहरूलाई आयोगसमक्ष पेश गरी सम्बन्धन स्वीकृति गर्ने र यसै शैक्षिक सत्रभित्र भर्ना प्रक्रिया प्रारम्भ गर्न शिक्षा, विज्ञान तथा प्रविधि मन्त्रालयलाई निर्देशन दिने निर्णय भएको छ,’ समितिको निर्णयमा उल्लेख छ ।