जब कभर्ड हलमा रामकुमारीका आँखा रसाए...

महिला भलिबलमा नेपालले भारतमाथि ऐतिहासिक जीत निकाल्दा शनिवार त्रिपुरेश्वरस्थित राष्ट्रिय खेलकुद परिषद्को कभर्डहलमा धेरैका आँखा रसाए । 

यसरी खुसीको आँशु झार्नेमा नेकपा (एकीकृत समाजवादी)की नेतृ रामकुमारी झाँक्री पनि थिइन् । पूर्वमन्त्रीसमेत रहेकी झाँक्रीले खुसीका आँशु हातले पुछेकी थिइन् । 

काभा महिला भलिबल नेसन्स लिगकाे आफ्नो दोस्रो खेलमा नेपालले भारतलाई ३–२ सेटले पराजित गर्दा कभर्ड हलको माहोल हेर्न लायक थियो । खेलाडी र पदाधिकारीमध्ये अधिकांशले हर्षका आँशु झारेका थिए । दर्शकले पनि खुलेरै खुसीयाली मनाए ।

किनकि महिला भलिबलमा नेपालले भारतलाई पहिलोपटक हराएको हो । 

नेपालले भारतलाई २५–१८, १२–२५, २५–१७, १८–२५, १५–१३ ले हराएको हो । प्रतियोगितामा आयोजक नेपालको याे दुई खेलमा शतप्रतिशत जीत हो । पहिलो खेलमा नेपालले श्रीलंकामाथि सोझो सेटको जीत निकालेको थियो ।  

यसअघि सन् २०१९ को सागको फाइनलमा नेपाल र भारतबीच राखेपकाे कभर्ड हलमै भेट भएको थियो । उक्त खेलमा नेपाल भारतसँग ३–२ ले पराजित बनेको थियो । नेपाल उपाधिबिमुख बनेको थियो ।