भारतको केरलामा पहिरोबाट ज्यान गुमाउनेलाई बाइडेनले दिए श्रद्धाञ्जलि

वासिङ्टन डीसी– अमेरिकी राष्ट्रपति जो बाइडेन र प्रथम महिला जिल बाइडेनले भारतको केरलास्थित वायनाडमा गएको पहिरोमा परी ज्यान गुमाएका २१० जना मानिसप्रति श्रद्धाञ्जलि अर्पण गरेका छन् । 

उनले शनिवार एक विज्ञप्तिमार्फत भारत सरकारप्रति समवेदना पनि व्यक्त गरेका छन् ।

‘जिल र म भारतको भारतको केरला राज्यमा भएको भीषण पहिरोबाट प्रभावित सबैप्रति गहिरो समवेदना प्रकट गर्दछौं,’ बाइडेनले भनेका छन्, ‘हामी शोक सन्तप्त परिवारजनमा धैर्य धारणा गर्ने सामर्थ्य मिलोस् भनी प्रार्थना गर्दै हार्दिक समवेदना प्रकट गर्दछौँ । यस कठिन समयमा हामी भारतीय जनताको साथमा छौँ ।'

लगातार वर्षापछि जुलाई ३० मा वायनाड जिल्लास्थित मेप्पडीको पहाडी क्षेत्रमा पहिरो गएको थियो । पहिरोमा २१० जनाको शव फेला परेको छ । ज्यान गुमाउनेमध्ये हालसम्म १४६ जनाको मात्र शव पहिचान भएको छ ।

घाइते भएकामध्ये १८७ जनालाई अस्पतालबाट डिस्चार्ज गरिएको अधिकारीहरूले शुक्रवार बताएका छन् ।