सुरुङ मार्ग 'ब्रेक थ्रु'मा प्रधान सेनापति शर्माको टिप्पणी- राजनीति नगरेनि बुझ्छौं

प्रधान सेनापति प्रभुराम शर्माले काठमाडौं-तराई-मधेश द्रुतमार्गको प्रस्थान बिन्दु खोकनामा राजनीति भएको गुनासो गरेका छन् । 

द्रुतमार्गअन्तर्गत पर्ने मकवानपुरको धेद्रे सुरुङ मार्गको 'ब्रेक थ्रु'मा आयोजित कार्यक्रममा बोल्दै प्रधान सेनापति शर्माले राजनीतिले गर्दा नै भएको समस्या भएको बताएका हुन् । 

सेनाले राजनीति नगरे पनि बुझ्ने गरेको उनले टिप्पणी गरे । 'काठमाडौं-तराई-मधेश द्रुतमार्गको प्रस्थान बिन्दु खोकनामा राजनीति भएको छ । राजनीतिले गर्दा भएको समस्या राजनीतिले नै सपार्नुपर्छ,' उनले भने, 'हामी (सेना)राजनीति नगरेनि राजनीति बुझ्छौं । 

खोकनामा जग्गा विवाद सुल्झिन सकेको छैन । उक्त क्षेत्रमा द्रुतमार्गको ६.५ किमि सडक पर्छ । 

काठमाडौं-तराई-मधेश द्रुतमार्ग आयोजना २०८३ सम्म सक्ने उनले प्रतिबद्धता जनाए । 

काठमाडौंबाट निजगढ जाने १७२८ मिटर लम्बाइ रहेको सुरुङ नेपाली सेनाको व्यस्थापनमा पोली च्याङ्दा चिनियाँ कम्पनीले निर्माण गरिरहेको छ ।

काठमाडौं-तराई मधेश द्रुत मार्ग आयोजनामा ६ स्थानमागरी जम्मा १०.३९० किमि लम्बाइको सुरुङ मार्ग बन्ने नेपाली सेनाले जनाएको छ । 

२०७४ वैशाख २१ को मन्त्रिपरिषद्को निर्णयपछि ०८१ मंसिरमा निर्माण सम्पन्न गर्नेगरी आयोजना व्यवस्थापनको जिम्मा नेपाली सेनाले पाएको थियो । 

तोकिएको समयमा काम नसकिएपछि पछिल्लोपटक म्याद थप गरी २०८३ चैत मसान्तसम्म सक्ने लक्ष्य सेनाको छ । तर, हालसम्म समग्र आयोजनाको भौतिक प्रगति जम्मा ३५.३८ प्रतिशत मात्रै छ ।