संगठनलाई चुस्त बनाउने कांग्रेसको योजना : केन्द्रीय सदस्यलाई ४ महिनासम्म जिल्लामा खटाउने

नेपाली कांग्रेसले संगठनलाई चुस्त बनाउन भन्दै केन्द्रीय सदस्यहरूलाई ४ महिनासम्म जिल्लामा खटाउने भएको छ ।

साउन २३ देखि शुरू हुने केन्द्रीय समितिको बैठकको लागि एजेण्डा तय गर्न सोमबार बसेको पदाधिकारी र पूर्वपदाधिकारीको बैठकमा केन्द्रीय सदस्यलाई चार महिनासम्म जिल्लामा खटाउनेबारे छलफल भएको कांग्रेस केन्द्रीय कार्यालयका मुख्य सचिव कृष्णप्रसाद पौडेलले जानकारी दिए ।

‘कांग्रेसले पार्टी संगठनलाई चुस्त बनाउने तयारी गरेका छ । यसैको लागि केन्द्रीय समितिको बैठकअघि पदाधिकारी र पूर्वपदाधिकारीको बैठक बसेको हो,’ पौडेलले लोकान्तरसँग भने, ‘पार्टीले एक केन्द्रीय सदस्यलाई कम्तीमा तीनदेखि चार महिनासम्म एउटा जिल्लामा खटाएर संगठन सुदृढीकरणको अभियान चलाउँछ । एक ठाउँमा सकिएपछि नेताहरूलाई फेरि अर्को जिल्लामा खटाइन्छ ।’

अभियान भदौदेखि शुरू गर्नेबारे आवश्यक निर्णय २३ साउनदेखि बस्ने केन्द्रीय समिति बैठकले गर्ने उनले बताए ।

पछिल्लो समयमा पार्टीका गतिविधि सुस्त बनेपछि कांग्रेसमा पार्टीका गतिविधिलाई अगाडि बढाउनुपर्ने दबाब पर्दै आएको छ ।

बैठकमा अलपत्र परेको महासमितिको निर्णयलाई टुंग्याउने विषयमा पनि छलफल भएको छ । प्राप्त सुझावलाई समेटेर महासमितिका निर्णय पास गर्ने भनिए पनि पटकपटक फेरिएका राजनीतिक समीकरणपछि कांग्रेस महासमितिका बैठकका निर्णय अलपत्र परेका छन् ।  

कांग्रेसको गत फागुन ७ देखि १० गतेसम्म चलेको महासमिति बैठकका बेला कांग्रेस र माओवादीको समीकरण थियो । लगत्तै कांग्रेस सत्ताबाट बाहिरिने र एमाले सत्तामा भित्रिने स्थिति बन्यो ।

फेरि असार १७ गते कांग्रेस र एमालेबीच नयाँ समीकरण बनाउने समझदारी भयो । यो समझदारीपछि असार ३० गते एमाले अध्यक्ष केपी ओली प्रधानमन्त्री बनेका छन् ।

राजनीतिक परिस्थिति फेरिएपछि कांग्रेसले महासमितिका निर्णयलाई पटकपटक परिवर्तन र परिमार्जन गर्नुपर्ने स्थिति बनेको थियो । अब भने दुई दलबीच सत्ता समीकरणमा आलोपालोको सहमति भएपछि महासमितिका निर्णयलाई सार्वजनिक गर्न सहजता भएको नेताहरू बताउँछन् ।