ढाकास्थित नेपाली दूतावासको एड्भाइजरी : सुरक्षित स्थानमा रहन आग्रह

बंगलादेशको राजधानी ढाकास्थित नेपाली दूतावासले त्यहाँ रहेका सम्पूर्ण नेपालीलाई आफू बसेको स्थानमा सुरक्षित रहन आग्रह गरेको छ ।

बंगलादेशमा अनिश्चितकालीन कर्फ्यु आदेश जारी भएपछि दूतावासले सोमबार एक सूचना जारी गर्दै यस्तो आग्रह गरेको हो ।

'हिंसात्मक प्रदर्शन भइरहेको सन्दर्भमा बङ्गलादेशमा रहनुभएका सम्पूर्ण नेपालीहरूलाई आफू बसेको स्थानमा सुरक्षित रहन र अधिकतम सतर्कता अपनाउन अनुरोध छ,' दूतावासबाट जारी सूचनामा भनिएको छ ।

उक्त सूचनामा बङ्गलादेशमा अध्ययनरत अधिकांश नेपाली विद्यार्थी नेपाल फर्किसकेको, बाँकी करिब ४ सय विद्यार्थीसहित सम्पूर्ण नेपाली सुरक्षित रहेको र उनीहरू दूतावाससँगको नियमित सम्पर्कमा रहेको उल्लेख छ ।

'नेपाल फर्किन चाहने विद्यार्थी तथा नेपालीले दूतावाससँग समन्वय गरी सुरक्षा प्रबन्ध सुनिश्चित भइसकेपछि मात्र यात्रा गर्नुहुन सम्बन्धित सबैको जानकारीको लागि यो सूचना प्रकाशित गरिएको छ,' सूचनामा भनिएको छ ।

आवश्यक समन्वयको लागि द्वितीय सचिव योजना बम्जनको फोन ८८०१८८०६९१०१३ र रिया क्षेत्रीको फोन नम्बर ८८०१७४५४०७९५८मा सम्पर्क गर्नसमेत दूतावासले आग्रह गरेको छ ।

बङ्गलादेशमा कोटा विरोधी आन्दोलन पुनः चर्किएर हिंसात्मक प्रदर्शन भइरहेको छ । साथै सरकारले अनिश्चितकालीन कर्फ्यु आदेश जारी छ ।