फेक लाइसेन्स बनाउने गिरोहको 'नयाँ ट्रिक'– मृतकको विवरण खोज्न घाटमै एजेन्ट परिचालन

चिनियाँ डिप्लोम्याट स्यान यु स्यानका नाममा नेपालमा जारी गरिएको सवारीचालक अनुमतिपत्रमा एडिट गरेर सानु थापाको नाममा लाइसेन्स जारी गरिएको छ ।

चिनियाँ डिप्लोम्याटको लाइसेन्स नम्बर ००-६-३८९३०० मा एडिट गरेर सानु थापालाई सोही नम्बरको 'फेक लाइसेन्स' वितरण गरेको पाइएको छ ।

ती डिप्लोम्याटलाई 'बी' क्याटेगरीको लाइसेन्स दिइएकोमा 'ए' वर्ग समेत थप गरेर थापालाई लाइसेन्स दिइएको खुलेको छ । थापालाई सवारी चालक अनुमति पत्र एकान्तकुना कार्यालयबाट लाइसेन्स दिइएको छ ।

***

युरोपेली युनियनका एक डिप्लोम्याटको नाममा जारी गरिएको सवारी चालक अनुमतिपत्रको विवरणमा पनि एडिट गरेर नेपालीको नाममा फेक लाइसेन्स जारी भएको छ ।

०१-०८-०१३७१६९५ नम्बरको लाइसेन्सको विवरणमा एडिट गरेर लक्ष्मण आचार्यलाई सोही नम्बरको फेक लाइसेन्स वितरण गरिएको पाइएको हो ।

'ए' र 'बी' गरी दुई वर्गको सवारी चालक अनुमतिपत्र आचार्यलाई दिएको खुलेको छ । आचार्यलाई यातायात व्यवस्था कार्यालय बुटवलबाट २०७९ मंसिरमा लाइसेन्स जारी गरिएको थियो ।

माथि उल्लेख गरिएका यी २ डिप्लोम्याटसँगै अन्य विभिन्न देशका डिप्लोम्याटको नाममा जारी गरिएको लाइसेन्समा एडिट गरेर नेपालीको नाममा फेक लाइसेन्स जारी गर्ने धन्दा नै चलेको देखिन्छ । नेपालमा काम गर्न आएका विदेशी डिप्लोम्याटले सवारी चलाउनका लागि नेपालमा प्रक्रिया पूरा गरेर नै सवारी चालक अनुमतिपत्र लिने गर्छन् ।

तर, आफ्नो कार्यकाल सकेर स्वदेश फर्किएका त्यस्ता विदेशी डिप्लोम्याटको लाइसेन्सको अभिलेख रहेको यातायात व्यवस्था विभागको डेटाबेसमा रहेको अभिलेखमा एडिट गरेर नेपालीको नाममा फेक लाइसेन्स वितरण गर्ने गरिएको छ ।

देशभरका विभिन्न यातायात कार्यालय र विभागबाट समेत फेक लाइसेन्स जारी भएकोबारे लोकान्तरले यसअघि देखिनै शृंखलाबद्ध रूपमा खुलासा गर्दै आएको छ ।

'फेक लाइसेन्स बनाउने गिरोहहरूमध्ये विगतमा नेपालस्थित विदेशका कुन–कुन डिप्लोम्याटहरूले लाइसेन्स लिएका थिए र आ-आफ्ना स्वदेश फर्किए भन्ने कुरा पत्ता लगाएर त्यस्ता डिप्लोम्याटको सिस्टममा रहेको विवरणमा हेरफेर गरेर सोही लाइसेन्स नम्बरमा नेपाली नागरिकलाई फेक लाइसेन्स बिक्री गरेको पाइएको छ,' विभाग स्रोतले लोकान्तरसँग भन्यो ।

फेक युजर आईडीबाट धन्दा, मसानघाटमै पुग्छन् विचौलिया

देशभरका यातायात कार्यालयमा कार्यरत कर्मचारीले पाएको युजर आईडीसँगै गिरोहको मिलेमतोमा नक्कली युजर आईडी बनाएर डेटाबेसमा विवरण हेरफेर गर्ने गरेको पाइएको छ ।

यातायात व्यवस्था कार्यालय बुटवलमा 'सेलेक्ट अल' नामक फेक युजर आईडी बनाएर सोही आईडीबाट ११५ वटा फेक लाइसेन्स जारी गरेको पाइएको हो ।

त्यसैगरी, यातायात व्यवस्था कार्यालय दाङमा 'अल युजर' नामक फेक आईडी बनाएर सिस्टमको विवरणमा हेरफेर गरी फेक लाइसेन्स वितरण गरिएको खुलेको छ ।

यसका अलावा यातायात व्यवस्था कार्यालय बुटवलमा 'एसएसएस' नामक फेक युजर आईडी बनाएर नक्कली लाइसेन्स वितरण गरिएको पाइएको छ ।

'यातायात व्यवस्था कार्यालयहरूमा सिस्टम चलाउन युजर आईडी पाएका व्यक्तिले नै दुई–दुईवटासम्म नक्कली युजर आईडी बनाएको पाइएको छ,' विभाग स्रोतले लोकान्तरसँग भन्यो, 'आधिकारिक सक्कली युजर आईडीबाट सक्कली काम गर्ने र आफैंले ह्याकरलाई पासवर्ड चोर्न दिएर ह्याक गरी दुई–दुईवटासम्म नक्कली युजर आईडी बनाएर त्यसैमार्फत सिस्टमको डेटा हेरफेर गर्ने गरेको पाइएको छ ।'

यातायात कार्यालयका कर्मचारीदेखि बिचौलिया समेत झन्डै ५ सय जनाको गिरोह नै फेक लाइसेन्स बनाउने, बिक्री वितरण गर्ने काममा संलग्न भएको हुनसक्ने उक्त स्रोतको दाबी छ ।  

स्रोतका अनुसार अझै रोचक कुरा त के भने– फेक लाइसेन्स बनाउने गिरोहले देशभरका विभिन्न घाटमा एजेन्ट नै परिचालन गरेको थियो ।

'धेरैजसो घाटमा ती गिरोहले एजेन्ट नै खटाएका रहेछन्,' स्रोतले थप्यो, 'कुन व्यक्तिको मृत्यु भएको हो भन्ने यकिन गर्ने, नागरिकता नम्बर समेत पत्ता लगाउने र त्यसपछि उक्त नागरिकता नम्बरको लाइसेन्समा विवरण हेरफेर गरी अर्को व्यक्तिलाई लाइसेन्स जारी गर्ने गरेको पाइएको छ ।'

मृत्यु भएका व्यक्तिको विवरणमा हेरफेर गरेर धेरै फेक लाइसेन्स जारी भएको खुलेको छ ।

नेपाल प्रहरीको केन्द्रीय अनुसन्धान ब्यूरोले केही फेक लाइसेन्समा छानबिन गरेर मुद्दा दर्ता गरे पनि अख्तियार दुरुपयोग अनुसन्धान आयोगले छानबिन भने टुंग्याएको छैन ।

अख्तियारले अझैसम्म यातायात व्यवस्था विभागबाट पत्राचार गर्ने र बुझ्ने काम मात्र गरिरहेको छ । अहिलेसम्म कुनै पनि कर्मचारीलाई बयानका लागि बोलाइएको छैन ।

पढ्नुहोस्, यो पनि :

'फेक लाइसेन्स' खारेजीका लागि चिट्ठी बोकेर विभाग धाउनेको लर्को, ४३ हजार थान रद्द