टीआरसी विधेयक अगाडि बढ्नु सुखद : प्रचण्ड

नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले टीआरसी विधेयकमा सहमति जुटेर प्रतिनिधिसभामा पुग्नुलाई सुखद समाचार भनेका छन् ।

शुक्रबारबाट शुरू भएको स्थायी कमिटीको बैठकमा समसामयिक राजनीतिबारे ब्रिफिङ गर्दै अध्यक्ष प्रचण्डले यस्तो बताएका हुन् । 

प्रचण्डले टीआरसी विधेयकका विषयमा सहजीकरण गर्न बनेको कार्यदलले सहमति गरेपछि, संसदीय समिति हुँदै प्रतिनिधिसभासम्म पुग्नुलाई सुखद समाचार भनेका प्रवक्ता अग्निप्रसाद सापकोटाले जानकारी दिए । 

‘अध्यक्षले पछिल्लो विकसित भएका घटनाक्रम, पार्टीका वैचारिक, राजनीतिक, सांगठनिक परिस्थिति र कार्यभार तथा विविध विषयमा एजेन्डा प्रस्तुत भएको छ,’ सापकोटाले भने, ‘यसमा वर्तमान परिस्थितिबारे टीआरसी विधेयकबारे पनि छलफल भयो । यो समितिबाट पास भएको छ । टीआरसी विधेयकको प्रतिनिधिसभा सुखद समाचार भएको छ भन्ने अध्यक्षको कुरा छ ।’

कानून, न्याय तथा मानव अधिकार समितिबाट टीआरसी विधेयक बिहीबार सर्वसम्मत रुपमा पारित भएको हो । 

प्रतिनिधिसभाको बैठकबाट टीआरसी विधेयक छिट्टै पारित गर्ने तयारी भएको छ । 

माओवादीले संगठन निर्माण, विस्तार, जनपरिचालनसहितका विषयमा निरन्तर स्थायी कमिटीमा छलफल गर्ने जानकारी प्रवक्ता सापकोटाले दिए ।