दुई ठूला दलले संविधानले दिएकाे अधिकार कटौती गर्न लागे भनेर गलत प्रचार भयो– उप्रधानमन्त्री सिंह

उपप्रधान एवं शहरी विकासमन्त्री प्रकाशमान सिंहले दुई ठूला दलले २०७२ सालको संविधानले दिएका अधिकार कटौती गर्दैछन् भनेर गलत प्रचार भएको गुनासो गरेका छन् । ३०औँ विश्व आदिवासी दिवसका अवसरमा शुक्रवार काठमाडौंमा आयोजित कार्यक्रममा उनले यस्तो गुनासो गरेका हुन् । 

उपप्रधानमन्त्री सिंहले जनतालाई थप अधिकार सम्पन्न गराउन र नतिजा दिन दुई ठूला दल नेपाली कांग्रेस  र नेकपा (एमाले)को सरकार बनेको स्पष्ट पारे । यसर्थ गलत प्रचारको पछि नलाग्न उनले सबैलाई आग्रह गरे । 

संविधानमा रहेको संघीय लोकतान्त्रिक गणतन्त्रात्मक समावेशी व्यवस्थालाई कार्यान्वयनमा लैजाँदै जनतालाई थप अधिकार सम्पन्न बनाउन सरकारले काम गर्ने सिंहको भनाइ थियो ।  

‘२००७, ४६ र ६२–६३ सालमा कांग्रेसको नेतृत्वमा आन्दोलन भयो । कांग्रेसकै नेतृत्वमा ०७२ को संविधान पनि जारी भयो । यसर्थ यसै व्यवस्थाको कार्यान्वयनमा हाम्रो जोड छ,’ उनले भने, ‘जनतालाई अधिकार दिलाउन लडेका पार्टी मिलेर सरकार बनेको हो । जनतालाई दिएको अधिकार कसैले खोस्न सक्दैन । संविधानले दिएको अधिकार पनि कटौती गर्न लागेको हो कि भन्ने हल्ला चलाइएको छ । यो गलत भाष्य हो ।’

०७२ को संविधानले दिएको अधिकार कार्यान्वयनमा केही कमजोरी भए सुधार गर्ने उपप्रधानमन्त्री सिंहले प्रतिबद्धता जनाए ।