ब्राजिलमा जहाज दुर्घटना, चालक दलका चार सदस्यसहित ६१ जनाको मृत्यु

ब्राजिलमा जहाज दुर्घटना हुँदा ६१ जनाको ज्यान गएको छ ।

चालक दलका सदस्यबाहेक ५७ यात्रु बोकेको जहाज ब्राजिलको साओ पाउलो भन्ने ठाउँमा शुक्रबार दुर्घटना भएको हो । 

दुर्घटनामा विमानमा सवार सबैको मृत्यु भएको बीबीसीले जनाएको छ । 

एटीआर ७२-५०० विमानमा ५७ यात्रु तथा ४ जना चालक दलका सदस्य रहेका थिए ।

दुई इन्जिन भएको टर्बोप्रप विमान दक्षिणी राज्य परानाको कास्केभेलबाट साओ पाउलो शहरका लागि उडेको थियो ।

विमान आवासीय क्षेत्रमा खसेको हो । तर, विमान खसेको आवासीय क्षेत्रमा भने अरु कोही पनि घाइते नभएको अधिकारीहरूले बताएका छन् ।​

सामाजिक सञ्जालमा भाइरल बनिरहेको दुर्घटनाको भिडियोमा जहाज एक चक्कर लगाएर धुँवाको मुस्लो उडाउँदै भुइँमै खसेको देखिएको छ । 

दुर्घटनापछि ब्राजिलका राष्ट्रपति लुइज इनासियो लुला दा सिल्भाले तीन दिने शोकको घोषणा गरेका छन् ।

ब्राजिल एयर फोर्स टोलीले दुर्घटनाको कारण पत्ता नलागेको र अनुसन्धान हुने जनाएको छ ।