भेरी अस्पतालको ‘सिटिस्क्यान मशिन’ बिग्रिँदा सेवाग्राही समस्यामा​

नेपालगन्जस्थित भेरी अस्पतालमा ‘सिटिस्क्यान मशिन’ सञ्चालनमा नआउँदा सेवाग्राही समस्यामा परेका छन् ।

बर्दिया मधुवन नगरपालिका, तारातालका राधेश्याम थारूले भेरी अस्पतालमा सिटिस्क्यान सेवा सञ्चालनमा नआउँदा उपचार गराउन समस्या भएको बताए ।

'यहाँ राम्रो उपचार होला भनेर बिरामीलाई ल्याइयो, चिकित्सकले सिटिस्क्यान गर्न भने पनि भेरीमा बिग्रिएकाले एक रात कुर्नुपर्‍यो,' उनले भने, 'भोलिपल्ट पनि नबनेपछि बिरामीलाई बाहिर सिटी स्क्यान गराउनु पर्‍यो ।'

अस्पतालमा लुम्बिनी, कर्णाली र सुदूरपश्चिम प्रदेशबाट पनि सिफारिस भएका बिरामी आउने गर्दछन् । सिटिस्क्यान मशिन  बिग्रिएको करिब एक महिना भइसकेको छ ।

अस्पतालका प्रमुख डा. प्रकाश थापाले सिटिस्क्यान मशिन नियमित रूपमा सञ्चालनमा ल्याउन प्रयासरत रहेको जानकारी दिए ।

उनले शुक्रबार भेरी अस्पताल नेपालगन्जमा आएका स्वास्थ्य तथा जनसंख्या मन्त्रालयका सचिव डा. रोशन पोखरेलसँग सिटिस्क्यानको समस्या देखाउँदै नयाँ सिटिस्क्यानको मागसमेत गरेका थिए ।

उनले पोखरेलले तत्काल नयाँ मशिन खरिदको सम्भावना नभएकोले पुरानै मशिन मर्मत गरी सेवा प्रवाह गर्न निर्देशन दिँदै दोस्रो त्रैमासिकसम्म नयाँ मशिन खरिदको प्रक्रिया अघि बढाउने जानकारी दिए ।

भेरी अस्पतालको स्तरोन्नति गर्दै सरकारले भौतिक पूर्वाधार विकास, विशेषज्ञ उपचार सेवा, दक्ष जनशक्ति, अत्याधुनिक उपकरण सेवा सुविधामा थप्दै गएको छ ।