टीआरसी विधेयक पीडित मैत्री छ : गृहमन्त्री लेखक

गृहमन्त्री रमेश लेखकले टीआरसी विधेयक पीडितमैत्री भएको बताएका छन् ।

काठमाडौंमा शनिबार भएको ‘टीआरसी विधेयकमा भएको ऐतिहासिक उपलब्धि : ऐन कार्यान्वयनमा द्वन्द्व पीडितहरूको सहभागिता’ विषयक अन्तरक्रियामा गृहमन्त्री लेखकले द्वन्द्व पीडितलाई केन्द्रमा राखेर टीआरसी विधेयक तयार गरिएको बताएका हुन् । 

‘टीआरसी विधेयक पीडितमैत्री बनाएका छौं । सबै पीडितलाई एक ठाउँमा लिएर समस्या समाधान गर्नुपर्छ,’ लेखकले भने । 

लेखकले द्वन्द्वकालका बलात्कारका दोषीलाई सजायमा छुट नहुने पनि स्पष्ट पारे ।

‘कारागारभित्र सबैभन्दा बढी कैदी बन्दी जबरजस्ती करणीका छन् । रेप  रेप नै हो । यी मुद्दामा कुनै अवस्थाले सजाय फरक हुँदैन । अरू अपराध भनेका कोही व्यक्ति विशेषका हुन सक्छन्,’ लेखकले भने, ‘केही समाज र केही राज्यविरुद्धका अपराध छन् तर बलात्कार भनेको त मानवताविरुद्धको अपराध हो । यसैले यी पीडाहरूलाई हामीले अलिकति अनुभव गरेर अगाडि बढ्न सक्यौं भने बलात्कारका घटना देशमा कम गर्न सकिन्छ ।’